Нимаи дуюми рӯзи 2 май наҷотдиҳандагони Кумитаи ҳолатҳои фавқулода дар вилояти Хатлон дар натиҷаи корҳои ҷустуҷӯӣ ҷасади як сокини 7-солаи деҳаи Арабхонаи ҷамоати деҳоти ба номи Носири Хусрави ноҳияи Қубодиёнро пайдо карданд.

Ӯ рӯзи 30 апрел дар канали маҳаллии Каттаариқ ғарқ шуда буд ва ҷасади ӯро се километр поёнтар аз ҷойи ҳодиса пайдо карданд.

"Ҷасади кӯдак ба мақомоти ҳифзи ҳуқуқ супурда шуд", - хабар медиҳад КҲФ.

Ҳамчунин, як рӯз пеш наҷотдиҳандагони КҲФ дар вилояти Хатлон ҷасади кӯдаки 8-соларо аз ҳудуди канали деҳаи Эшонқишлоқи ноҳияи Левакант пайдо карданд.

Гуфта мешуд, ки ин кӯдак шоми 20-уми апрел аз хона баромада ғайб задааст дар ҷустуҷӯ қарор дошт.

Кормандони Кумита ҷасадиин  писарбачаро низ аз канал берун оварда, ба мақомоти ҳифзи ҳуқуқ супурдаанд.

Дар ҳамин ҳол, тибқи иттилоъи бахши навбатдории Раёсати КҲФ дар вилояти Хатлон, рӯзи 2 май, сокини 14-солаи деҳаи Чучуи ҷамоати Даҳана ҳангоми оббозӣ дар канали ноҳияи Ёвон ғарқ шудааст. Ҷустуҷӯи ӯ идома дорад.

Дар робита ба ин Кумитаи ҳолатҳои фавқулода бори дигар ба сокинони кишвар муроҷиат кардааст, ки фарзандони ноболиғи худро беназорат нагузоранд ва аз наздик шудани онҳо ба канлу дарё ва обанборҳо бе ҳамроҳии калонсолон пешгирӣ кунанд.

Дар Telegram, Facebook, Instagram, OK ва ВК бо мо бимонед.