Чор узви як оила аз ҷамоати деҳоти Дӯстии деҳаи Ашти ноҳияи Ашт дар муҳоҷирати корӣ дар пайи сӯхтор ба ҳалокат  расидаанд.

Сардори оила Бойназар Хушназарови 54-сола, келинаш Сарвиноз Бойназароваи 27-сола ва ду наберааш рӯзи 3-юми ноябр дар бӯстонсарои канори шаҳри Сургути Русия, ки дар он сӯхтор рух дод, ҷон бохтанд.

Дар ин бора рӯзи 11-уми ноябр бародари Сарвиноз Бойназарова, Шаҳриёр Бекмирзоев ба “Азия-плюс” иттилоъ дод.

Расонаҳои Русия низ қабалн дар ин бора хабар дода буданд.

Бекмирзоев гуфт, кӯдакони хоҳараш Раҳимов Ёсин 1,6-сола ва  Илҳомзода Фараҳнози 4-сола буданд.

Умарҷон Маҳмудҷонов, имомхатиби масҷиди ҷамоати деҳоти Ашт ба “Азия-Плюс” гуфт, ҳамаи фавтидагон рӯзи ҷуъаи 8-уми ноябр ба хок супорида шуданд.

Гуфта мешавад, ки се сол пеш ҳамсари Бойназар аз бемории вазнин фавтида буд. Баъди марги ҳамсар падари хонадон бо фарзанду арӯс ва набераҳояш барои пеш бурдани зиндагии худ ба Русия рафта буданд.

Дар Telegram, Facebook, Instagram, OK ва ВК бо мо бимонед.