Дар пайи омадани сел ва сангрезаву фаромадани тармаҳо дар рӯзи гузашта, 29-уми апрел баъзе роҳҳо дар минтақаҳои гуногуни кишвар баста шуда, ба заминҳои кишти сокинон зарар расидааст.

Кумитаи ҳолатҳои фавқулода хабар додааст, ки субҳи 29-уми апрел дар деҳаи Мулвоҷи ноҳияи Ишкошим сел омада, роҳи мошингарди Хоруғ-Ишкошимро бастааст. Сабаби омадани сел об шудани барфҳо дар пайи баланд шудани ҳарорати ҳаво гуфта мешавад.

Мақомот гуфтаанд, ки ҳоло ин роҳро поккорӣ доранд, вале маълум нест, ки он кай боз мегардад. Дар натиҷаи ин ҳодиса хисорот сабт нашудааст.

Ҳамчунин, КҲФ иттилоъ додааст, ки шоми рӯзи гузашта дар деҳаи Ғази ҷамоати Иван-Тоҷики ноҳияи Мастчоҳ дар пайи об шудани барф сел омада, ба 4 замини наздиҳавлӣ, 6 гектар заминҳои кишт, 10 бинои ёрирасон ва инчунин 400 метр роҳ зарар расонидааст.

Ин ниҳод гуфтааст, мақомот дар ҷои ҳодиса ҳузур доранд ва зарари расидаро маълум мекунанд. 

КҲФ дар идома аз рух додани як сангреза дар деҳаи Ревади ҷамоати Урметани ноҳияи Айнӣ хабар додааст, ки гуфта мешавад, шоми 29-уми апрел сабт шудааст. Ин ҳодиса боиси баста шудани роҳи Айнӣ-Панҷакент барои чанд соат шудааст.

Мақомот гуфтаанд, ки ҳоло роҳ барои ҳаракати яктарафа боз аст ва онҳо талош доранд, ки ҷодаро пурра тоза кунанд.

Кумитаи ҳолатҳои фавқулода, инчунин, хабар додааст, ки шаби гузашта дар дар километри 106-уми роҳи мошингарди Рӯшон-дарёи Бартанг дар ҳудуди ҷамоати Савноби ноҳияи Рӯшон дар натиҷаи гарм шудани ҳаво тарма омада, ин масирро бастааст. Ин ниҳод гуфтааст, ки корҳо барои тоза кардани роҳи мазкур идома дорад, аммо дақиқ нест, ки он кай боз мегард.

Дар пайи гарм шудани ҳаво, КҲФ ҳушдор медиҳад, ки хатари омадани сел то чанд рӯзи дигар боқӣ мемонад. Ин ниҳод аз аҳолӣ хост, ки ин рӯзҳо аз рафтан ба моҳидорӣ, шикор, чорвочаронӣ ва чидани гиёҳҳои доруӣ худдорӣ кунанд.

Ҳамчунин, Кумита аз ронандагон хостааст, ҳангоми ҳаракат дар роҳҳои кӯҳӣ эҳтиёткор кунанд ва суръатро боло набурда, фосилаи байни мошинҳоро риоя намоянд. боэҳтиёт бошанд.

Дар Telegram, Facebook ва Instagram бо мо бимонед.