Ҳангоми насби оина дар бинои баландошёнае дар Душанбе чор мард афтода, ду тани онҳо ба ҳалокат расидаанд. Ду нафари дигар ба беморхона қарор доранд.

Дар ин бора аз Раёсати Кумитаи ҳолатҳои фавқулода дар шаҳри Душанбе  ба "Азия-Плюс" хабар дода, гуфтанд, ҳодиса дар маҳаллаи Бофандаи пойтахт рух додааст.

Манбаъ гуфт, ки се нафари онҳо сокинони шаҳри Ҳисор ва як каси дигар истиқоматкунандаи ноҳияи Фирдавсии пойтахт мебошад.

"Қурбониёни фоҷиа ду марди яке 21 ва дигаре 37 сола мебошанд. Ду шахсе, ки дар беморхона қарор доранд яке 25 ва дигаре 41 сола ҳастанд. Як нафари онҳо дар беморхонаи "Шифобахш" ва дигар нафар дар Беморхонаи шаҳрии рақами 3 интиқол ёфтанд",-гуфтанд дар Раёсати ҚҲФ.

Дар ин ниҳод иброз доштанд, ки айни ҳол таҳқиқи сабабҳои ҳодиса идома дорад.

Маълум нест, ки онҳо кай ва аз чандум ошёна ба замин афтидаанд.

Дар ҳамин ҳол, охири ҳафтаи гузашта, дар рӯзҳои истироҳатӣ, дар шабакаҳои иҷтимоӣ наворе нашр шуд, ки гуфта мешуд, чанд нафар аз бинои баландошёна ба замин афтоад, ду нафари онҳо ба ҳалокат расидаанд. Дар навор зикр мешавад, ки мардҳо дар ошёнаи шашуми бинои 18-ошёна зимни насби оина ба замин сарозер шудаанд.

Лаҳзаи кӯмак ба осебдидаҳо

Бори аввал нест, ки сокинони зимни сохтмони биноҳо аз ҳодисаҳои нохуш ба ҳалокат мерасанд. Қаблан бар асари афтодани девори атрофи манзили сохташуда се кӯдак ба ҳалокат расида буданд.

Ҳодиса дар маҳаллаи кӯчаи Ҳабибулло Назаров рух додааст, ки дар он корхонаи “ДСК Тоҷикистон” сохтмонро анҷом додааст. Масъулини ширкат гуфтанд, деворе, ки кӯдакон дар зери он ҷон доданд, ба онҳо тааллуқ надошт.

Додситонии ноҳияи И.Сомонии пойтахт аз рӯи ин ҳодиса парвандаи ҷиноӣ боз карда, чанд тан аз кормандони ширкати “ДСK Тоҷикистон”-ро боздошт карда буд.

Дар Telegram, Facebook ва Instagram бо мо бимонед.