Душанбе. 25-уми октябр. ОИ «Азия-Плюс» - Дахлнопазирии намояндаи мардумӣ ба ҳабси собиқ роҳбари нерӯгоҳи «Норак» барои азхудкунии маблағҳои давлатӣ ба миқдори ниҳоят калон монеъ аст.

            Дар як нишасти хабарӣ директори Агентии назорати давлатии молиявӣ ва мубориза бо коррупсияи ҷумҳурӣ Шерхон Салимзода гуфтааст, ки агентӣ аз Прокуратураи генералӣ дархост кардааст, дахлнопазирии собиқ роҳбари нерӯгоҳи «Норак» чун намояндаи мардумӣ бекор карда шавад, то ӯ барои содир намудани ҷиноят ба ҳабс гирифта шавад.

            Ба қавли Ш.Салимзода, собиқ роҳбари нерӯгоҳи «Норак» ва муовини ӯ Маҳмадалӣ Ҳалимов дар ғайриқонунӣ азхуд кардани маблағҳои давлатӣ ба миқдори 1 млн. 282 ҳазору 700 сомонӣ (ҳудуди 380 ҳазор доллари амрикоӣ) гумонбар дониста мешаванд.

            Зикр гардид, ки муовини роҳбари нерӯгоҳ феълан бо намояндагони тафтишот ҳамкорӣ мекунад ва масъалаи ба ҳабс гирифтани собиқ роҳбари ӯ мавриди баррасӣ қарор дорад.