Дар Тоҷикистон фаъолияти гурӯҳи қочоқбарони маводи нашъаорвар, ки аъзои он таҳти пайгарди қонунии байнулмилалӣ қарор доштанд, қатъ карда шуд.

Тавре ба ОИ «Азия-Плюс» аз мақомоти ҳифзи ҳуқуқи ҷумҳурӣ хабар доданд, ин гурӯҳ дар Қазоқистон зимни интиқоли миқдори навбатии маводи мухаддир ошкор гардидааст. «Ҳангоми баргузории чорабиниҳои фаврӣ-ҷустуҷӯйӣ аз ҷониби кормандони мақомоти ҳифзи ҳуқуқи Қазоқистон яке аз аъзои гурӯҳ боздошт гардида, ба аъзои боқимондаи гурӯҳ, аз ҷумла роҳбари он – шаҳрванди Тоҷикистон Р.Х. муяссар мегардад, ки пинҳон шаванд. Онҳо ба пайгарди қонунии байнулмилалӣ эълон шуда буданд», - гуфт манбаъ.

Зикр гардид, ки ҷустуҷӯйи аъзои дигари гурӯҳ муддати 6 моҳ ба ҳеҷ натиҷае нарасидааст. Сипас бо дархости мақомоти салоҳиятдори Қазоқистон кормандони Агентии назорати давлатии молиявӣ ва мубориза бо коррупсияи ҶТ низ ба ҷустҷинояткорон пардохтанд. Онҳо дар муддати якчанд рӯз макони будубоши аъзои гурӯҳро муайян карданд.

«Ҳафтаи гузашта ба мо муяссар шуд, ки дар Душанбе роҳбари гурӯҳ ва як нафар ҳамроҳи ӯро боздошт намоем. Дар хонаи иҷораи онҳо беш аз 42 кило маводи мухаддир, аз ҷумла 9 кило героин ва 33 кило афюн дарёфт ва мусодира карда шуд», - идома дод манбаъ. Аз рӯйи ин далел парвандаи ҷиноӣ боз гардида, тафтишот идома дорад.