Парвандаи ҷиноӣ нисбат ба Муҳаммад Тиллозода, писари арбоби маъруфи сиёсӣ, раиси Ҳизби наҳзати исломии Тоҷикистон ва вакили палатаи поёнии парлумони ҷумҳурӣ Муҳиддин Кабирӣ имрӯз ҷиҳати баррасӣ ба суди шаҳри Ваҳдат ирсол мегардад.

Тавре ба ОИ «Азия-Плюс» Бузургмеҳр Ёров, вакили мудофеи М.Тиллозода хабар дод, чанде қабл ӯ бо зерҳимояи худ дар боздоштгоҳи муваққатии ШКД-и Ваҳдат вохӯрдааст. «Вазъи М.Тиллозода хуб аст ва ӯ боварӣ дорад, ки суд нисбат ба ӯ ҳукми одилона содир хоҳад кард», - гуфт вай.

Ёдрас мекунем, ки М.Тиллозодаи 21-сола аввали моҳи май ба ҳабс гирифта шуда, айни замон дар боздоштгоҳи муваққатии ШКД-и шаҳри Ваҳдат нигоҳ дошта мешавад. Ӯ дар содир намудани ҷиноят мутобиқи моддаи 212-и КҶ ҶТ (Вайрон кардани қоидаҳои ҳаракати роҳ ва истифодаи воситаҳои нақлиёт) гунаҳкор карда мешавад.

Дар таърихи 3-юми майи соли равон дар қаламрави шаҳри Ваҳдат як толибилми 12-сола Муҳсиддин Ортиқов зери мошини «Toyota Camry» таҳти идораи Муҳаммад Тиллозода монда, рӯзи дигар аз ҷароҳатҳои бардошта дар беморхона ба ҳалокат расид. Ин ҳодиса дар рӯзи ба хок супурдани ҷасади модари раиси ҲНИТ ба вуқӯъ пайваст.

Дар ҳамин ҳол, тавре ба ОИ «Азия-Плюс» аз қароргоҳи ҲНИТ хабар доданд, ҳизб аз мақомоти ҳифзи ҳуқуқ, ки ба тафтиши қазияи мазкур машғуланд, дархост кардааст, ки тафтишот дар доираи қонунгузории амалкунандаи Тоҷикистон гузаронида шавад. Писари М.Кабирӣ донишҷӯйи яке аз мактабҳои олии Малайзия аст.