Наздикони Иззат Аммон мегӯянд, ки эҳтимол меравад, дар сурати пешниҳод кардани маълумотнома аз ВКД ба Додгоҳи олӣ, ин ниҳод парвандаро дигарбора баррасӣ кунад.

Рӯзи душанбеи 16-уми ноябр Додгоҳи олии Тоҷикистон, ҳангоми баррасии шикоят, аз наздикони ҳомии маҳкумшудаи муҳоҷирони тоҷик Иззат Амон хоста буд, ки аз Вазорати умури дохилии Тоҷикистон маълумотнома биёранд, ки нисбати ӯ парвандаи дигаре кушода шудааст ё не. Дар ин бора наздикон Иззат Амон бо такя ба хулосаи Додгоҳи олӣ хабар доданд.

Онҳо гуфтанд, ҳафтаи равон додраси Додгоҳи олӣ бе ҳузури Иззат Амон шикояти вакили дифоъ ва наздиконашро баррасӣ кард ва ҳукми додгоҳи ибтидоиро бетағйир гузошт.

- Аз Додгоҳи олӣ гуфтанд, аз ВКД маълумотнома биёред, ки алайҳи Иззат Амон парвандаи дигаре кушода шудааст ё не, гуфт –Муҳаммадюсуф Холов писари Иззат Амон.

Дар ҳамин ҳол, онҳо мегӯянд, маълум нест, бо кадом далел чунин як маълумотнома пурсида шудааст. Вале як нафари наздик ба парванда ба “Азия-Плюс” гуфт, сабаби дархости маълумотнома пахши видеову гузоришҳо бо ҳимоят аз Иззат Амон ва ҳамчунин даъвоҳо алайҳи ӯ дар шабакаҳои иҷтимоӣ аст.

- Мувофиқи қонуни афви имсол як қисми мавод ҷудо ва пурра баррасӣ нашуда бошанд, афв нисбати гумонбар татбиқ намешавад. Яъне мақомот мехоҳанд мутмаин бошанд, ки чунин иддаоҳо боиси боз шудани парвандаи нав шудааст ё не, -гуфт ҳамсуҳбати мо.

Манбаъи мо гуфт, дар сурати гирифтани маълумотнома аз ВКД Додгоҳи олӣ ҳукми содиршуда дар баробари Иззат Амонро дубора баррасӣ мекунад.

Дар ҳамин ҳол, аз Дафтари матбуоти ВКД ба "Азия-Плюс" дар мавриди боз шудан ё нашудани парвандаи нав алайҳи Иззат Амон изҳори бехабарӣ карданд.

Наздиконаш бовар доранд,  ба зидди Иззат Амон ба ҷуз аз парвандаи қаллобӣ иттиҳоми дигаре эълон нашудааст. Онҳо мегӯянд, аллакай вакили дифои Иззат Амон ба ВКД барои дарёфти маълумотномае, ки додгоҳ хостааст дархост додааст ва мунтазири посух ҳастанд.

Муҳаммадюсуф Холов, писари Иззат Амон
Акси Радиои "Озодӣ"

“Азия-Плюс” талош кард, назари Додгоҳи олии Тоҷикистонро дар пайванд ба баррасии охири парванда ва талаби маълумотнома бигирад, вале муваффақ нашуд.

Дафтари матбуоти ин ниҳод барои дарёфти ин мавқеи Додгоҳ дархости мактуби расмӣ кард.

Иззат Амон рӯзи 19 октябр, бо қарори Додгоҳи шаҳри Душанбе 9 сол равонаи зиндон гардид. Аз ин пештар, вакили дифои Иззат Амон изҳори умедворӣ карда буд, ки бо эълони афв ба муносибати 30-солагии Истиқлол парвандаи Иззат Амон шомили афв мешавад.

Иззат Амон, роҳбари "Маркази тоҷикон" дар Маскав ва яке аз ҳомиёни ҳуқуқи муҳоҷирон дар Русия рӯзи 25-уми март дар Русия нопадид шуд ва баъдан ВКД Тоҷикистон гуфт ӯро дар Душанбе боздошт ва алайҳи ӯ бо гумони "қаллобӣ ба миқдори махсусан калон" (қисми чаҳори моддаи 247-и Кодекси ҷиноӣ) парванда боз кардааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.