Мурофиаи додгоҳии се корманди милитсияи шаҳри Кӯлоб дар робита ба  марги Абдуқаҳҳор Розиқов, сокини ин шаҳр, ки боиси эътирози пайвандони ӯ ва чанде аз сокинони шаҳр гардида буд, оғоз шудааст. Онҳо ба шиканҷаи Абдуқаҳҳор Разоқови 37-сола айбдор мешаванд.

Умед Ниёзов, вакили дифои оилаи Розиқовҳо дар суҳбат бо “Азия-Плюс” гуфт, тафтишот се корманди милитсия - Шамшод Шарифов, Зафар Холов ва Ҷамшед Кароматовро бо моддаи 143 иловаи 1-и  қисми 3 (шиканҷа) Кодекси ҷиноятии Тоҷикистон ҶТ айбдор мекунад.

Қаблан, онҳо барои “баромадан аз ҳадди ваколатҳои мансабӣ” (қисми севуми моддаи 316-и Қонуни ҷиноӣ) айбдор мешуданд.

“Баъдан, дар рафти тафтишоти пешакӣ, муфаттишон моддаи 316-ро ба моддаи 143 иловаи 1 қисми 3 (шиканҷа)-и Кодекси ҷиноятии Тоҷикистон бандубаст карда, ба додгоҳ ирсол карданд. Мурофиаи судӣ идома дорад”,- гуфт Умед Ниёзов.

Қаблан, Радиои Озодӣ хабар дода буд, ки аз се корманди Раёсати корҳои дохилии Кӯлоб, ки дар робита ба марги сокини 37-солаи Кӯлоб Абдуқаҳҳор Розиқов дастгир шуда буданд, ду нафарашон ба шарти берун нарафтан аз маҳалли зист озод гардида, танҳо муқобили нафари сеюм, ба гумони “баромадан аз ҳадди ваколатҳои мансабӣ” (қисми севуми бо моддаи  316-и Қонуни ҷиноӣ) парванда боз шудааст.

Ёдовар мешавем, ки Абдуқаҳҳор Розиқов шаби 2-юм ба 3-юми январ, пас аз боздошт аз сӯйи маъмурони милиса, ҷон бохт. Наздиконаш даъво доранд, ки ӯ бар асари шиканҷа ҷон бохтааст, аммо мақомоти расмӣ мегӯяд, шиканҷа шудани ӯ ҳанӯз тасдиқи худро наёфтааст.

Дар пайи ин ҳодиса, даҳҳо сокини шаҳри Кӯлоб дар назди сардхонаи бемористони шаҳр ҷамъ омада, аз мақомот сабаб ва омилони марги Абдуқаҳҳор Розиқовро талаб карданд. Наздиконаш иддао доранд, ки ӯ бар асари шиканҷа даргузаштааст.

ВКД бо нашри изҳорот сабаби марги Абдуқаҳҳор Розиқовро истифодаи зиёди маводи сахттаъсири навъи амфетамин номид.

Дар изҳороти ВКД гуфта мешавад, ки 2-юми январи соли 2023 дар натиҷаи гузаронидани чорабиниҳои оперативӣ-ҷустуҷӯӣ аз тарафи кормандони милисаи Раёсати ВКД дар вилояти Хатлон Пиронов Акбар Самадқулович ҳангоми ба муомилот баровардани маводи нашъадор дастгир ва аз ӯ 356 гр ҳашиш дарёфт карда шуд.

Аз нишондодҳои дастгиршуда Пиронов А.С. маълум карда шуд, ки номбурда маводи нашъадори мазкурро аз шаҳрванд Розиқов Абдуқаҳҳор Исроилович ба маблағи 5000 сомонӣ харидорӣ намудааст.

Дар изҳороти ВКД таъкид мешавад, ки 3-юми январи соли 2023, Розиқов А.И. дар манзили истиқоматиаш дастгир шуда, аз хонаи ӯ маводи нашъадори навъи ҳашиш дарёфт ва мусодира карда шуд.

Дар Telegram, Facebook, Instagram, OK ва ВК бо мо бимонед.