Ду пирамарди сокини шаҳри Хуҷанд ба расонидани зарари вазнин ба саломатӣ дар ҳодисаҳои ҷудогона гумонбар дониста мешаванд.
Тавре ки маркази матбуоти ВКД Тоҷикистон хабар медиҳад, дар ҳодисаи аввал марди 71-сола дар ҳолати мастӣ барои бо духтараш ҷанҷолу муноқиша намудани домоди 37-солааш, сокини ноҳияи Бобоҷон Ғафуров бо корди хоҷагӣ ба шикам ва банди дасти чапи ӯ зарба задааст.
Гуфта мешавад, дар ҳодисаи дуюм марди 66-сола низ дар ҳолати мастӣ рӯзи 21 сентябр, соати 22:00 дар чойхонаи ҷамоати деҳоти ноҳияи Бобоҷон Ғафуров бо сокини маҳаллии 57-сола бе ягон асос баҳсу муноқиша намуда, бо корд ба ӯ зарба мезанад.
Аз рӯйи ин далелҳо мутобиқи моддаи 110 Кодекси ҷиноятии Тоҷикистон (Қасдан расонидани зарари вазнин ба саломатӣ) парвандаҳои ҷиноятӣ боз шуда, тафтишот ҷараён дорад.
Тибқи ин модда, ба гумонбаршавандагон ҷазои маҳрумият аз озодӣ ба муҳлати аз 5 то 8 сол таҳдид мекунад.
Руcский