Душанбе. 12-уми июл. «Азия-Плюс» — | Раиси Ҳизби наҳзати исломии Тоҷикистон, вакили палатаи поёнии парлумони ҷумҳурӣ Муҳиддин Кабирӣ дар кори конфронси 2-юми Форуми байнулмилалии вакилони исломӣ (IFIP), ки дар Малайзия баргузор шуд, ширкат ва суханронӣ намуд.

Тавре ба ОИ «Азия-Плюс» аз қароргоҳи ҲНИТ хабар доданд, дар суханронии худ Муҳиддин Кабирӣ андешаҳояшро перомуни тамоилҳои мавҷуда дар сайёра, ҷаҳони исломӣ ва минтақаи Осиёи Марказӣ иброз доштааст. «Раиси ҲНИТ бо мақомоти раҳбарии Ҳизби исломии Малайзия низ гуфтушунид карда, аз онҳо даъват ба амал овард, ки ба Тоҷикистон ташриф оранд», - гуфт сарчашма.

Дар Куала-Лумпур Муҳиддин Кабирӣ ҳамчунин ният дорад, ки бо донишҷӯёни тоҷик, ки дар макотиби олии Малайзия таҳсил доранд, низ мулоқот кунад.

Форуми байнулмилалии вакилони исломӣ соли 2007 дар Ҷакарта – пойтахти Индонезия аз тарафи 350 вакили исломии кишварҳои гуногун таъсис шудааст, ки дар ҳоли ҳозир адади аъзои он бештар аз 500 нафар мебошад. Ҳадафи аслии созмон муттаҳид намудани намояндагони кишварҳои гуногун буда, фаъолияти вакилии худро баҳри сарбаландӣ ва рушди миллату кишварҳои исломӣ бахшидаанд.