Вазири корҳои хориҷии Тоҷикистон Сироҷиддин Муҳриддин мегӯяд, ки Чин дар баробари Тоҷикистон дигар даъвои арзӣ ва марзӣ надорад. Навиштаҳои иғвоангези бархе расонаҳои ҷудогонаи ин кишвар мавқеи расмии ҳукумати Чин нестанд, - гуфт вазир дар нишасти матбуотии ниҳодаш.

"Нисбат ба он матолибе, ки бархе сомонаҳои ғайриҳукуматии Чин навишта буданд, мо ба вазорати корҳои хориҷии ин кишвар ёддошт (нота) фиристодем. Намояндагони сафорати мо бо намояндаҳои Вазорати корҳои хориҷии Чин ва ҳамчунин бо раҳбарони ҳамон расонаҳое, ки ин гуна матолибро нашр намуда буданд, вохӯрӣ карданд. Баъди ин дидорҳо ҳамон мақолаҳои иғовбарангез аз сомонаи он расонаҳо пок карда шуд".

Мо дар тамоми бахшҳо ва аз ҷумла дар масоили мавриди баҳс ҳам ҳамкории бисёр хубе бо Чин дорем. Вақте муроҷиат мекунем ҷониби Чин бисёр зуд ҷавоб мегардонад. Ҳама ҷақт аз ҳамкориҳои дуҷониба стратегии ду давлат ёд меорад ва мегӯяд, ки ин чизҳое, ки дар сомонаҳои ғайрирасмӣ нашр мешаванд, ҳеч гоҳ мавқеи расмии мо нест, гуфт Сироҷиддин Муҳриддин.

Ҳамчунин ба гуфтаи вазири корҳои хориҷии Тоҷикистон ҳоло миёни Тоҷикистону Чин ҳеч баҳси арзиву марзӣ вуҷуд надорад ва ҳамкориҳои мо дар сатҳи стратегӣ бисёр хуб ҷараён дорад.

Ҳамчунин Сироҷиддин Муҳриддин бори дигар иддаоҳои бунёди пойгоҳи низомӣ аз сӯйи Чин дар қаламрави Тоҷикистон, аз ҷумла Бадахшонро рад кард ва гуфт, ки дар Тоҷикистон танҳо як пойгоҳи низомии Русия вуҷуд дораду халос.

Сироҷиддин Муҳриддин гуфт, ки Чин мисли кишварҳои дигар, аз ҷумла ИМА дар бунёд ва таҷҳизи постгоҳои марзӣ ба Тоҷикисон ёрӣ мерасонад ва мо ҳамчунин шартномаои байнидавлатӣ барои баргузор кардани тамринҳои муштараки низомиро дорем, ки ин тамринҳо дар вақте, ки ҷонибҳо тавофуқ кардаанд, гузаронида мешаванд.

Бояд гуфт, ки дар поёни соли гузашта ва аввали моҳи январ чанд расонаи чинӣ дар мавриди даъвоҳои арзиву марзӣ бар сари Тоҷикистон матолиб нашр карданд. Чанде аз хабаргузориҳои Чин дар авоили моҳи январ дигарбора дар мавзӯи заминҳои баҳсии Тоҷикистону Чин мақолаҳои нав ба нашр расонданд. 

Пойгоҳи хабарии “Гул баёнгари таърих” (鲜花畅谈历史) , ки бештар доир ба мавзуҳои таърихӣ мақолаву гузориш нашр мекунад, рӯзи 3 январ мақолаеро бо номи “Таърихи Тоҷикистон, ки 9,28 миллион нафар аҳолӣ дорад, аз куҷо сарчашма мегирад?” навиштааст, ки “Тоҷикистон ҳамеша дар ҳудуди Чин буд”.

Тоҷикистон дар вокунишҳои андаки худ ҳамеша ин даъвоҳоро иғвобарангез ва бепоя хондааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.