Вазорати адлияи Тоҷикистон пас аз омӯзиш қарорҳои дахлдори Анҷумани ғайринавбатии XVIII Ҳизби демократи Тоҷикистонро тасдиқ ва нусхаи санади расмии бақайдгирии ҳизби сиёсиро ба номи раиси тозаинтихоби ҳизб Шаҳбози Аброр ба Шӯрои сиёсии Ҳизби демократи Тоҷикистон ирсол кардааст.

Дар ин бора АМИТ “Ховар” хабар дода, менависад, дар мактуби расмии Вазорати адлия омадааст, ки “Ҳизби демократи Тоҷикистон минбаъд фаъолияти оинномавии худро тибқи оинномаи ҳизб идома диҳад”.

Анҷумани ғайринавбатии Ҳизби демократи Тоҷикистон 10-уми майи соли ҷорӣ дар шаҳри Душанбе баргузор шуд ва дар ҷараёни он, фаъолияти раҳбари, инак, собиқи ҲДТ Саидҷаъфар Усмонзода, ки ҳамзамон ягона вакили парлумон аз ин ҳизб аст, “ғайриқаноатбахш” баҳогузорӣ шуд. Саидҷаъфар Усмонзода, ки дар ин анҷумани ғайринавбатӣ иштирок накард, аз курсии раиси ҳизб барканор шуд. Ӯ анҷуман ва қарорҳои онро ғайриоинномавӣ номид.

Шаҳбози Аброр, раиси ҳамакнун тозаинтихоб ва аз ҷониби Вазорати адлия эътирофшудаи ҲДТ то ҳол муфассал дар ин бора чизе нагуфтааст.

Аммо Саидҷаъфар Усмонзода, имрӯз зимни сӯҳбати телефонӣ бо “Азия Плюс” гуфт, ҳоло тасмими минбаъдаро нагирифтаанд ва пас аз машварат дар ҷаласаи Шӯрои сиёсии ҲДТ хулоса хоҳанд кард, ки ба додгоҳ муроҷиат кунанд ё воқеиятро қабул намоянд.

“Вазорати адлия ба мактуби ман то ҳол посух надодааст. Ҷавоби онро интизор хоҳем буд”,-гуфт Саидҷаъфар Усмонзода.

Ҷараёни анҷумани ғайринавбатии ҲДТ
Акс аз рӯзномаи "Истиқлол"

Ӯ қаблан зикр карда буд, ки ҳар хулосае, ки Вазорати адлия диҳад, қабул хоҳад кард. Аммо ҳоло зикр мекунад, ки “анҷуман ғайриқонунӣ буд, бояд  Вазорати адлия мактубу далелҳое, ки пешниҳод карда будем, ба назар мегирифтанд”.

“Ҳоло тасмим дорем ҳамроҳи Шӯрои сиёсӣ машварат кунем ва хулосаи ниҳоиро барорем. Дар асоси пешниҳодҳои аъзои Шӯрои сиёсӣ, мумкин аст ба додгоҳ муроҷиат кунем ва ё воқеиятро қабул намоем”, - таъкид кард Саидҷаъфар Усмонзода.

Ёдовар мешавем, ки буҳрони навбатӣ дар сафи ҲДТ аввали моҳи май сар зад. Он замон чанде аз аъзоёни ҳизб ҷаласаи Шӯрои сиёсии ҳизбро баргузор карда, қарори даъвати анҷумани ғайринавбатиро қабул карданд.

Онҳо ангезаи даъвати анҷумани ғайринавбатиро ба “беамалии роҳбарияти ҳизб ва ба таври дахлдор фаъолият накардани” марбут донистанд.

Саидҷаъфар Усмонзода он замон дар саҳифаи “Фейсбук”-аш навишт, ки “гурӯҳи номаълум бо сардории Шаҳбози Аброр ва Юлдошев Абдуҷаббор мехоҳанд рӯзи 11 майи соли 2024 анҷумани ғайринавбатии ҲДТ-ро баргузор кунанд, ки ин рафтори ғайриоинномавӣ буда, ба Шӯрои сиёсии ҲДТ алоқаманд нест”.

Новобаста ба ин, рӯзи 11-уми май анҷумани ғайринавбатӣ баргузор шуд ва иштирокдорони он Саидҷаъфар Усмонзодаро аз вазифа барканор ва ба ҷойи ӯ Шаҳбози Аброрро раиси нави ҲДТ интихоб карданд.

Пас аз баргузории анҷуман Усмонзода онро ғайриқонунӣ ва худро роҳбари қонунии ҳизб хонда, гуфт, интизори баҳои ҳуқуқии Вазорати адлия ба ин амал аст.

Дар хухуси ихтилофу кашмакашҳои навбатӣ дар Ҳизби демократи Тоҷикистон аз матлаби “Раиси пешин ва нави ҲДТ дар интизори хулосаи Вазорати адлия. Усмонзода аз мандати вакили парлумон маҳрум мешавад?” маълумоти бештар метавонед пайдо кунед.

Дар Telegram, Facebook ва Instagram бо мо бимонед.