Раиси Маҷлиси миллии Маҷлиси Олии Тоҷикистон, шаҳрдори Душанбе Рустами Эмомалӣ ҷиҳати иштирок дар ҷаласаи навбатии Шӯро ва ҷаласаи 58-уми пленарии Ассамблеяи Байнипарламентии Иттиҳоди Давлатҳои Мустақил ( АБП ИДМ) ба Русия рафт.

Тавре ки дафтари матбуоти палатаи болоии парлумони ҷумҳурӣ хабар медиҳад, дар ин сафар ӯро раисони кумитаҳои Маҷлиси миллӣ ва дигар шахсони расмӣ ҳамроҳӣ мекунанд.

Пагоҳ, 18 апрел раисони парлумонҳо, вакилон ва аъзои палатаҳои болоии парлумони кишварҳои ИДМ дар маросими тантанавии гулчанбаргузорӣ дар маҷмаааи Пискарёв иштирок мекунанд. Сипас дар Кохи Таврида  ҷаласаи 58-уми пленарии Ассамблеяи Байнипарлумонии ИДМ баргузор мешавад.

Дар ҷаласа намояндагони парлумонҳои кишварҳои аъзои ИДМ аз фаъолият дар соли 2024 натиҷагирӣ карда, масоили омодагӣ ба нишастҳои қарибулвуқуи байнулмилалиро баррасӣ мекунанд.

Ҳамин рӯз меҳмонони фахрии Ассамблея дар кори ҷаласаи Ассамблеяи Байнипарлумонии ИДМ  бахшида ба 80-солагии Ғалаба дар Ҷанги Бузурги Ватанӣ иштирок мекунанд.

Ба иттилои Ассамблеяи Байнипарлумонии ИДМ, дар доираи иҷлосияи Ассамблея дар мавзӯи “Танзими муқовимат ба истифодаи ҳуши маснӯӣ ва технологияҳои нав бо ҳадафҳои террористӣ тибқи қонунгузорӣ” конфронси байнулмилалӣ доир мегардад.

Дар конфронс масоили хавфу таҳдидҳои марбут ба истифодаи ҳуши маснӯӣ бо ҳадафҳои террористӣ, инчунин ҷустуҷӯ ва дарёфти тавозун байни амнияту бехатарӣ ва инноватсия мавриди баррасӣ қарор мегиранд.

Ҳамчунин дар ҷаласаҳои Комиссияи муттаҳида оид ба ҳамоҳангсозии қонунгузорӣ дар соҳаи амният, инчунин комиссияҳои доимӣ оид ба мудофиа ва амният, масоили сиёсӣ ва ҳамкориҳои байнулмилалӣ масъалаҳои гуногун баррасӣ хоҳанд шуд.

Дар Telegram, Facebook ва Instagram бо мо бимонед.