Эмомалӣ Раҳмон, раисҷумҳури Тоҷикистон бо ирсоли номае ба унвони Масъуд Пизишкиён, ҳамтоии эронии худ фарорасии солрӯзи Инқилоби исломии Эронро ба ӯ ва мардуми кишвараш табрик гуфтааст. Дар ин бора Сафорати Эрон дар Душанбе рӯзи 7-уми феврал хабар додааст.

“Ба муносибати фаро расидани ҷаши миллии Ҷумҳурии Исломии Эрон аз ҷониби худ, давлат ва мардуми Тоҷикистон самимонатарин табрикоти некро ба ҷаноби олӣ (Масъуд Пизишкиён) ва мардуми дӯсти Эрон иброз менамоям”, - омадааст дар номаи раисҷумҳури Тоҷикистон.

Ӯ дар идома гуфтааст, ки “собиқаи таърихии мардуми мо яке аз пояҳои асосии тақвияти равобити муосир ва фазои эътимод миёни кишварҳои ҳамзабон ва ҳамфарҳанги мо ба шумор меравад”. Эмомалӣ Раҳмон, ҳамчунин, густариши ҳамкориҳо бо Эронро авлавияти сиёсати хориҷии Тоҷикистон дониста, ба тавсеаи робитаҳои дуҷониба таъкид кардааст.

“Ба Шумо, ҷаноби олӣ, саломатии комил ва комёбиҳои навин ва ба мардуми дӯсту бародари Эрон рӯзгори хуш, сулҳ ва суботи пойдор, инчунин, пешрафт ва шукуфоии пайвастаро орзумандам”, - гуфтааст раисҷуҳури Тоҷикистон.

Инқилоби исломии Эрон ҳамасола дар ҳафтаи аввали моҳи феврал  (22 баҳман) ҷашн гирифта мешавад. 47 соли қабл, дар пайи як инқилоб дар моҳи феврали соли 1979 дар Эрон, тахти шоҳ Муҳаммадризо Паҳлавӣ сарнагун шуда, заминаи рӯи кор омадани низоми ҷумҳурии исломӣ ба роҳбарии Руҳуллоҳ Хумайнӣ фароҳам шуд.

Дар Telegram, Facebook ва Instagram бо мо бимонед.