Душанбе. 7-уми октябр. ОИ «Азия-Плюс» - Президенти Тоҷикистон Эмомалӣ Раҳмон дар ҷаласаи Шӯрои сарони кишварҳои узви Иттиҳоди Давлатҳои Мустақил (ИДМ) ва Шӯрои байнидавлатии Иттиҳоди иқтисодии Авруосиё (ЕврАзЭС), ки рӯзҳои 9-10-уми октябр дар шаҳри Бишкек баргузор мешавад, иштирок хоҳад кард.

            Аз Дастгоҳи иҷроияи сарвари давлат ба ОИ «Азия-Плюс» хабар доданд, ки дар мулоқоти сарони кишварҳои узви ИДМ ба масъалаи рушди ҳамкориҳои коммуникатсионӣ ва нақлиёт таваҷҷӯҳи хосса зоҳир хоҳад шуд.

            Ғайр аз ин, дар назар аст, ки соҳаи энергетика чун бахши калидии муносибатҳои ҳамкории мутақобилаи кишварҳо муайян карда шуда, соли 2009 - Соли ҷавонон дар ИДМ эълон гардад.

            Зикр гардид, ки дар ҷаласаи Шӯрои байнидавлатии ЕврАзЭС масоили ҳамгиройии минбаъдаи иқтисодӣ ва ҳамкорӣ дар роҳи раҳоӣ аз бӯҳрони ҷаҳонии молиявӣ мавриди муҳокима қарор хоҳанд гирифт.

            «Дар доираи сафари дурӯза Э.Раҳмон инчунин бо ҳамтоҳои худ аз кишварҳои узви ИДМ ва ЕврАзЭС дидору гуфтушунид хоҳад кард», - афзуд манбаъ.

            Ёдрас мекунем, ки кишварҳои Тоҷикистон, Ӯзбекистон, Қирғизистон, Қазоқистон, Русия ва Белорус узви Иттиҳоди иқтисодии Авруосиё мебошанд.