То 1 сентябри соли 2021 дар маркази вилоятҳо ва шаҳру навоҳии Тоҷикистон беморхонаҳои касалиҳои сироятӣ сохта ба истифода дода мешаванд.

Онҳо бо ҷалби соҳибкорони бонангу номус бунёд гардида, бо таҷҳизоти зарурии тиббӣ таъмин мегарданд, гуфта мешавад дар яке аз бандҳои Нақшаи чорабиниҳо оид ба иҷрои дастуру супоришҳои Сарвари давлат, ки зимни боздид аз иншооти шаҳри Душанбе ва мулоқот бо кормандони соҳаи тандурустӣ 20 майи соли равон баён дошт.

Нақшаи мазкур 27 май аз ҷониби Президенти Тоҷикистон Эмомалӣ Раҳмон ба тасвиб расид, хабар медиҳад АМИТ «Ховар».

Мувофиқи он, Ситоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти нави коронавируси COVID-19 дар Тоҷикистон ва Вазорати тандурустӣ бояд фаъолияташонро ҷиҳати пурра аз байн бурдани ин беморӣ, сари вақт бартараф кардани камбудиҳои ҷойдошта ва ҳалли мушкилоти мавҷуда тақвият бахшанд ва аз натиҷаи корҳои баанҷомрасида ба Сарвари давлат мунтазам ҳисобот пешниҳод намоянд.

Ғайр аз ин, Вазорати тандурустӣ ва мақомоти иҷроияи ҳокимияти давлатии вилоятҳо ва шаҳру ноҳияҳо вазифадор шудаанд, ки то 15 июн ва минбаъд то ба эътидол омадани вазъи эпидемикӣ бо мақсади қабулу табобати беморон беморхонаҳои муваққатӣ ва катҳои иловагӣ дар беморхонаҳои мавҷуда омода намоянд.

Ба ин ниҳодҳо ҳамчунин дастур дода шудааст, ки фаъолияти бонизоми бемористону дармонгоҳҳо, марказҳои саломатӣ ва бунгоҳҳои тиббиро мунтазам зери назорати қатъӣ қарор диҳанд ва онҳоро бо доруворӣ, таҷҳизоти муосири тиббӣ ва маводи ғизоиву беҳдоштӣ таъмин намуда, сатҳи сифати хизматрасониро ба беморон боз ҳам беҳтар кунанд.

Тибқи Нақшаи чорабиниҳо, Кумитаи сохтмон ва меъморӣ, Дирексияи сохтмони иншооти ҳукуматӣ ва мақомоти иҷроияи ҳокимияти давлатии шаҳри Душанбе бояд солҳои 2020-2021 лоиҳаи сохтмони маҷмааи беморхонаи сироятӣ дар пойтахт барои 1500 катро омода карда, аз моҳи сентябри соли 2020 корҳои сохтмонӣ барои 650 катро шурӯъ намоянд.

То 5 июн бо мақсади муайян кардани сабабу оқибатҳои бемории коронавирус бояд бо ҷалби олимони соҳаҳои тиб, физика, химия, биология, генетика ва дигар бахшҳо гурӯҳи корӣ таъсис диҳанд ва барои амалӣ кардани тавсияҳои онҳо тадбирҳои саривақтӣ андешида шавад.

Гуфта мешавад, бо мақсади муҳайё намудани шароит ва сабук кардани ҳуҷҷатгузорӣ ҳангоми бақайдгирӣ ва истеҳсоли маводи доруворӣ то 10 июли соли равон ба қонуни Тоҷикистон «Дар бораи маводи доруворӣ ва фаъолияти фармасевтӣ» тағйиру иловаҳо ворид мегардад.

Инчунин мутобиқи ин санад, вазорату идораҳои марбута муваззаф гардидаанд, ки то 1 август барномаи давлатии миёнамуҳлати тайёр кардани кадрҳои соҳаи тандурустӣ дар дохил ва хориҷи кишвар, махсусан мутахассисони бахшҳои вирусология, эпидемиология, реаниматология ва бозомӯзии онҳо, дар истеҳсолот ҷорӣ кардани ваксинаҳо, маводи доруворӣ ва воситаҳои муҳофизат бо мақсади пешгирӣ ва табобати бемориҳои сироятии намудҳои нав таҳия ва ба ҳукумати мамлакат пешниҳод намоянд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.