Ба қонун “Дар бораи Бонки миллии Тоҷикистон” тағйироту иловаҳо ворид шуд, ки мувофиқи он, кормандони Бонки миллӣ ба пешниҳоди маълумот дар бораи сарчашмаи даромадҳои иловагии худ уҳдадор мешаванд.

Гуфта мешавад, пардохти маблағи андоз аз даромад ва амволи кормандони Бонки миллӣ (ба ҷуз ҳайати шахсии техникӣ ва хизматрасон) бо тартиби аз ҷониби ҳукумат муқаррашуда сурат мегирад.

Ҳамчунин мувофиқи боз як тағйирот, дар Бонки миллӣ якҷоя кор кардани шахсони хешу ақрабои наздик ба ҳамдигар манъ мешавад.

Зан (шавҳар), фарзандон, падар, модар, бародарон, хоҳарон, набераҳо, инчунин падару модар, бародарону хоҳарон ва фарзандони зан (шавҳар), волидони ҳамсарон, қудоҳо, келин, домод, ҷиянҳо, инчунин дигар шахсоне, ки ҳамроҳ зиндагӣ ва рӯзгори умумӣ доранд, хешовандони наздик шуморида мешаванд.

Ёдрас мекунем, ки моҳи июли соли равон ҳукумати кишвар шаклҳои нави эъломия барои мансабдорони давлатӣ дар бораи даромад ва амволи хизматчиёни давлатӣ ва инчунин тартиби пур кардани онҳоро тасдиқ кард.

Мувофиқи қонунгузории феълии ҷумҳурӣ, хизматчии давлатӣ уҳдадор аст, ки ҳар сол на дертар аз 1 апрели баъди соли ҳисоботӣ ба мақомоти андози маҳалли зист эъломия оид ба андоз аз даромад ва вазъи молу мулкро пешниҳод намояд.

Пешниҳод накардани эъломияҳо ё дар он нишон додани маълумоти нодуруст барои аз хизмати давлатӣ озод кардани хизматчии давлатӣ ва ба хизмати давлатӣ қабул нагардидани шаҳрванд асос шуда метавонанд.

Мувофиқи моддаи 123-и Кодекси андози Тоҷикистон, мақомоти андоз ба ифшо кардани маълумоти эъломияҳо ҳуқуқ надоранд.

Лекин агар худи соҳиби эъломия хоҳиш дошта бошад, ки дар бораи сарчашмаҳои даромади худ хабар диҳад, пас ин ҷо ягон маҳдудият намешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.