Душанбе. 5-уми август 2009. ОИ «Азия-Плюс» - Дар сохторҳои калидии Вазорати корҳои дохилии Тоҷикистон тағйироти кадрӣ сурат гирифт.

Чӣ тавре ки ба ОИ «Азия-Плюс» аз мақомоти қудратӣ иттилоъ доданд, тибқи фармони вазири корҳои дохилӣ, полковники милиса Маҳмадсаид Саидов сардори Раёсати Бозрасии давлатии автомобилӣ таъин шуд. Ӯ қаблан ба ҳайси сардори Раёсати умури дохилии вилояти Хатлон ва роҳбари шӯъбаи ҷумҳуриявии бақайдгирӣ ва имтиҳонот ифои вазифа менамуд. Собиқ сардори Раёсати бозрасии давлатии автомобилӣ Хӯҷамурод Холов аз мансб сабукдӯш гардида, айни замон дар ихтиёри раёсати шӯъбаи кадрҳо қарор дорад.

Подполковники милиса Абдураҳмон Бузмаков, ки моҳи феврали соли ҷорӣ ба вазифаи сардори Раёсати ҷустуҷӯи ҷиноӣ таъин гардида буд, акнун Раёсати корҳои дохилии вилояти Хатлонро роҳбарӣ хоҳад кард. Ба дӯши полковники милиса Нурулло Орифов вазифаи сардори Раёсати ҷустуҷӯи ҷиноӣ вогузор гардид.

Ғайр аз ин, полковники милиса Анвар Тағоймуродов сардори Раёсати мубориза бо ҷинояткории муташаккил таъин гардид. Айни замон шахсони тоза ба мансаб таъингардида ба ҳайати шахсӣ муаррифӣ мегарданд.