Душанбе. 15 апрел. «Азия-Плюс» - | Дар шарқи Тоҷикистон, дар мавзеи Болошаҳри ноҳияи Рашт, таърихи 14 апрел, миёни нерӯҳои давлатӣ ва афроди ношиноси мусаллаҳ даргирӣ ба вуқӯъ пайваст, хабар медиҳад манбаъ дар яке аз мақомотҳои қудратӣ.  «Дар натиҷаи задухурд 3  корманди ВКД ва 1 тан корманди ниҳоди махсус кушта шуданд», иттилоъ дод манбаъ. Ҷангҷӯён аз ҷои ҳодиса ғайб заданд, амалиёти ҷустучӯйи идома дорад афзуд манбаъ.

Ба иттилои як манбаи дигар дар мақомоти қудратӣ, дар натиҷаи бархурд 8 ҷангҷӯ ва ду тан корманди ниҳодҳои давлатӣ ба ҳалокат расиданд.  Маълумоти манобеи ғайрирасмӣ мухталиф буда пайдо кардани иттилои расмӣ, дар ҳоли ҳозир, ба «АП» муяссар намешавад.

Дар хусуси оғози амалиёти махсус  алайҳи  ҷангҷӯёни гурӯҳи Мулло Абдулло ба «АП» cубҳи рӯзи панҷшанбе  манобеъ аз иҳотаи  наздикон ва тарафдорони собиқ нерӯҳои мухолифин хабар доданд.  Дар  ВКД ва Вазорати дифоъи Тоҷикистон ин хабарро рад намуда гуфтанд, ки дар қаламрави ноҳияи Нурободи вилояти Рашт машқҳои оперативӣ-тактикии неруҳои қудратии  кишвар, бо истифода аз техникаи ҳарбӣ гузаронда мешавад.