Рӯзи якшанбе, 28-уми августи соли равон аз зиндонҳои воқеъ дар минтақаи шимоли кишвар ҳудуди 700 нафар маҳбусони мавриди афв қароргирифта озод карда мешаванд.

Твре ба ОИ «Азия-Плюс» сардори Раёсат оид ба иҷрои ҷазои ҷиноии вилояти Суғд Олимҷон Саидолимов хабар дод, махбусон аз муассисаи низоми қатъӣ ва шадид ва ҳамчунин боздоштгоҳи сукунат озод мегарданд. Миёни афвшудагон маҳбусони ҷинояти махсусан вазнин содирнамуда, аз ҷумла маҳбусони ба истилоҳ «сиёсӣ» низ ҳузур доранд. Онҳо маҳбусоне мебошанд, ки барои узвият дар созмони «Ҳизб-ут-таҳрир» маҳкум шудаанд ё ҳамчунин ҳаммаслакони Маҳмуд Худойбердиев ба ҷуз созмондиҳандагону роҳбаронаш мебошанд. Ғайр аз ин, маҳбусони бемору маъюб, ки мавриди афв қарор гирифтаанд, низ озод карда мешаванд.

Пас аз озод шудан барои то манзили зист расонидани маҳбусон аз ҳисоби ҳукумати вилоят ва маъмурияти раёсати мазкур нақлиёт ҷудо карда мешавад.

«Дар афви мазкур ҳудуди 70 дарсади маҳбусон озод карда мешаванд. Ғайр аз ин, аз корҳои ислоҳӣ боз 800 нафари дигар озод мегарданд. Мутассифона, ҳудуди 15-20 дарсади мавриди афв қароргирифтагон дубора ҷиноят содир намуда, ба зиндон дубора бармегарданд. Онҳо асосан дуздон, қаллобон ва авбошон мебошанд», - афзуд сардори Раёсат оид ба иҷрои ҷазо.