Шахси бар асари фурӯрезии бино дар шаҳри Маскав фавтида шаҳрванди Тоҷикистон аст.

Бино ба маълумоти хадамоти матбуоти сафорати Тоҷикистон дар Русия, ахиран, тибқи иттилои мақомоти тафтишотии кишвари иқомат, шахсияти нафари фавтида ҳангоми ҳодисаи ёдшуда рӯшан гардида, он шаҳрванди Ҷумҳурии Тоҷикистон, бошандаи шаҳри Панҷакент Қушқоров Тулқин Умаралиевич (соли таваллудаш 1994) мебошад.

Ба иттилои манбаъ, ҷасади Тулқин, пагоҳ, тавассути ҳавопаймои хатсайри Москва – Хуҷанд ба Ватан фиристода хоҳад шуд.

Ҳашт нафари шаҳрвандони дигари Тоҷикистон, ки бар асари ин ҳодиса ҷароҳатҳои ҷисмонӣ бардоштанд, дар ҳоли ҳозир дар шифохонаҳои гуногуни шаҳри Москва бистарианд.

Ёдрас мекунем, ки шаби 16 ба 17-уми апрели соли равон (тахминан соати 01.40) дар минтақаи ҷануби шаҳри Москва фурӯрезии биное ба вуқӯъ пайваста, дар натиҷа 1 нафар фавтид ва беш аз 10 нафар, аз ҷумла 8 шаҳрванди Тоҷикистон осеб диданд.

Бино ба маълумоти хадамоти матбуоти Сарраёсати КҲФ дар шаҳри Маскав, фурӯрезии бинои 6-ошёна дар натиҷаи риоя накардани ҷараёни технологӣ зимни баргузор намудани корҳо оид ба бетонрезии бомҳои миёни ошёнаҳо сурат гирифтааст.