Рӯзи 28-уми августи соли равон дар Агентии назорати маводи нашъаовари назди Президенти ҶТ маросими супоридани таҷҳизот барои Агентӣ ба маблағи 576 ҳазор доллари ИМА баргузор гардид.

Бино ба иттилои шуъбаи робита бо ҷомеаи Агентӣ, таҷҳизоти мазкур дар доираи кӯмаки Барнома оид ба мубориза бар зидди маводи нашъаовари Сафорати ИМА дар Тоҷикистон супорида шуд ва он аз воситаҳои алоқа, тоскулоҳ, камзӯли тирногузар, дастгоҳи мушоҳидаи шабона ва рӯзона, дурбин ва ғайра иборат мебошад.

Дар маросими имзои санади қабул муовини Директори Агентӣ полковник Ҳ. Маҳмудзода ва роҳбари Барномаи мубориза бар зидди маводи нашъаовари Сафорати ИМА дар Тоҷикистон ҷаноби Брент Пешта иштирок намуданд.

Дар нутқи худ Ҳ. Маҳмудзода Сафорати ИМА дар Тоҷикистонро арзи сипос кард ва бовар намуд, ки ҳамаи таҷҳизоти супорида шуда дар фаъолияти ҳамарӯзаи Агентӣ дар соҳаи мубориза бар зидди маводи нашъаовар самаранок истифода бурда мешавад.

Ҷаноби Пешта қайд намуд, ки Сафорати ИМА дар Тоҷикистон кӯшиш дорад ҳамкории худро бо кишварҳои Осиёи Марказӣ, аз ҷумла бо Тоҷикистон васеътар намояд.