Дар минтақаи шимоли ҷумҳурӣ зимни баррасии як парвандаи ҷиноӣ ба гумони даст доштан дар узвият ба ҳизбу ҳаракатҳои фаъолияташон мамнӯъ ва нияти иштирок кардан дар амалиёти ҷангӣ дар Сурия 38 тан аз сокинони вилоят боздошт шуданд.

Тавре ба «Азия-Плюс» аз прокуратураи вилояти Суғд хабар доданд, зимни баррасии ин парванда, ки ҳанӯз 26-уми сентябр боз шудаву он замон 2 сокини вилоят, ки нияти ба «ҷиҳод» ба Сурия рафтанро доштанд, боздошт гардиданд. Сипас тибқи нишондоди онҳо, боз 8 нафари дигар ҳаммаслаконашон низ дастгир шуданд.

«Минбаъд боз 28 нафари дигар боздошт гардиданд, ки тибқи маълумоти мақомоти интизомӣ, узви созмонҳои ҷиноятпешаи «Ҷамоати Ансоруллоҳ» ва «Ҳаракати исломии Туркистон» мебошанд, ки онҳо низ нияти иштирок дар «ҷиҳод» дар Сурияро доштанд», - гуфтанд дар прокуратураи вилоят.

Зимнан зикр гардид, ки нисбати 38 нафар боздоштшудагон парвандаи ҷиноӣ боз шуда, тафтишот дар ин самт идома дорад.

Қобили зикр аст, ки дар зарфи 9 моҳи соли ҷорӣ нисбати 49 нафар сокинони вилояти Суғд, аъзои фаъоли ҳизбу ҳаракатҳои динӣ ва ифротгаро 29 парвандаи ҷиноӣ боз шуда, 14 парвандаи ҷиноӣ нисбати 22 нафар ҷиҳати баррасӣ ба судҳо ирсол шудааст. Миёни ин афрод 7 нафар ба узвият дар ташкилоти ҷиноятпешаи «Ҳаракати исломии Ӯзбекистон, 5 тан ба – «Ҳизб-ут Таҳрир», 24 нафар ба «Ҷамоати Ансоруллоҳ», 7 нафар ба – «Ҷабҳат-ун-нусра» гумонбар дониста шуда, боз 6 нафари дигар дар амалҳои ҷангӣ дар Сурия иштирок мекунанд.