Шаби гузашта 8 нафар аъзоёни гурӯҳи мусаллаҳи қочоқбарони фаромиллӣ сарҳади давлатии Тоҷикистонро дар минтақаи Хоруғ ғайриқонунӣ убур карда, ба муқовимати сарҳадбонони тоҷик рӯбарӯ шудаанд. 3 нафар қочоқбар боздошт шуда, боқимонда ба самти Афғонистон фирор кардаанд.

Дар ин бора,  АМИТ “Ховар” бо такя ба Маркази матбуоти Отряди сарҳадии “Хоруғ”-и Раёсати Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар Вилояти Мухтори Кӯҳистони Бадахшон  хабар медиҳад.

“28 апрели соли 2023, шабона соати 1-у 30-дақиқа, гурӯҳи мусаллаҳи қочоқбарони фаромиллӣ иборат аз 8 нафар, таҳти роҳбарии Додихудо, Нодиршо ва Забӣ валади Муҳаммадсахӣ, сокинони қарияи Барпанҷаи вулусволии Шуғнони вилояти Бадахшони Афғонистон, бо мақсади интиқоли маводи мухаддир дар ҳаҷми махсусан калон ва силоҳу лавозимоти ҷангӣ, хати сарҳади давлатии Тоҷикистон ва Афғонистонро дар аломати 184-уми минтақаи муҳофизатии дидбонгоҳи сарҳадии 9-уми “Тишор”-и Отряди сарҳадии “Хоруғ”  убур намуданд”, - менависад ин расона.

Гуфта мешавад, ки қочоқбарон ба амри марзбонони тоҷик дар хусуси таслим шудан итоат накарда, аз силоҳҳои гурӯҳӣ оташ кушоданд, аммо ба муқовимати сарҳадбонони тоҷик тоб наоварда, маводи мухаддир ва силоҳу лавозимоти ҷангиро дар ҷои ҳодиса партофта, бо истифода аз торикии шаб ба тарафи Афғонистон фирор карданд.

“Дар ҷои ҳодиса 3 нафар ҳаммаслакони қочоқбарони афғон аз ҳисоби шаҳрвандони Ҷумҳурии Тоҷикистон, Домуллоҷонов Эмин Амирович, соли таваллудаш 1982, зода ва истиқоматкунандаи шаҳри Бӯстони вилояти Суғд, Саидманзаров Нидо Сайфуллоевич, соли таваллудаш 1993, зодаи деҳаи Ёмчи ноҳияи Шуғнон, сокини шаҳри Хуҷанд ва Саидмурсалов Наврас Саидмусоевич, соли таваллудаш 1987, зода ва истиқоматкунандаи ноҳияи Шуғнони Вилояти Мухтори Кӯҳистони Бадахшон дастгир карда шуданд”, - зикр мегардад дар изҳорот.

Таъкид мегардад, ки аз ҷои ҳодиса 45 кг маводи мухаддири сахттаъсири навъи “героин”, 1 адад автомати Калашников бо 4 адад тирдон, 74 дона тир, 1 адад дурбини махсуси назорати шабона, 10 (даҳ) ҳазор доллари ИМА дарёфт ва мусодира карда шуд.

“Мутаассифона, ҳангоми задухӯрди мусаллаҳона бо қочоқбарони афғон як нафар хизматчии ҳарбӣ ба ҳалокат расид”, - хабар медиҳад АМИТ “Ховар”.

Дар робита ба ҳодисаи мазкур парвандаи ҷиноятӣ оғоз карда шуда, чорабиниҳои фаврӣ-ҷустуҷӯӣ ва тафтишотӣ идома доранд.

Ёдовар мешавем, ки ин ҳодисаи дуюми сарҳадшиканӣ давоми ду рӯзи охир аст. Субҳи имрӯз, 26-уми апрел, низ ду аъзои  ташкилоти байналмилалии террористӣ, ки бо мақсади анҷом додани амали террористӣ аз Афғонистон ба Тоҷикистон гузаштанд, аз ҷониби нерӯҳои тоҷик нобуд карда шуда, аз онҳо яроқу муҳимоти ҷангӣ мусодира карда шуд.

Дар Telegram, Facebook, Instagram, OK ва ВК бо мо бимонед.