Соли равон Иди моҳи мубораки Рамазон дар Тоҷикистон санаи 28-уми июл таҷлил мегардад.

Раиси Шӯрои уламои Маркази исломии Тоҷикистон Саидмукаррам Абдуқодирзода ба «Азия-Плюс» дар ин робита иттилоъ дод, ки мусалмонони кишвар Иди Фитрро рӯзи душанбеи ҳафтаи оянда, санаи 28-уми июл ҷашн мегиранд ва дар ин рӯз дар тамоми масҷидҳои кишвар бахшида ба анҷоми моҳи шарифи Рамазон намози ид хонда мешавад.

Ба гуфтаи ӯ, дар Шӯрои навбатии улуми Маркази исломии Тоҷикистон, ки 23-юми июл баргузор мешавад, вақти саҳеҳи баргузор шудани намоизи ид эълон карда мешавад.

Қобили зикр аст, ки соли равон маблағи закот (андози ҳатмии солона ба фоидаи камбизоатон)-ро мусалмононе месупоранд, ки на камтар аз 2 ҳазору 175 доллари ИМА воситаҳои зиёдатӣ доранд. Ҳаҷми садақаи фитр (хайрия) имсол 4 сомонӣ барои 1 моҳ муқаррар шудааст. Ин маблағ бо назардошти қоидаҳои шариати ислом бо нархи 2 кило орд муайян гардидааст.

Маъмулан, дар ин рӯз субҳи зуд кӯдакон бо табрикоти ид ба хонаҳо омада, идона мегиранд. Рӯзи ид пас аз пардохти закот ба дидори хешу ақрабо ва барои дуову фотеҳа сари мазори гузаштагони худ мераванд. Баҳри пешвози меҳмонон дар хонаводаҳо дастурхони идона ороста мешавад.

Мутобиқи Қонуни ҶТ «Дар бораи рӯзҳои ид», Иди Рамазон дар кишвар рӯзи истироҳат эълон шудааст.