Ҳудуди ҳазор нафар имрӯз таҳти роҳбарии раиси шаҳри Кӯлоб Абдуғаффор Раҳмонов ба ҳашари поксозии бозори чанде қабл оташгиифта баромаданд.

Мудири шуъбаи иқтисоди мақомоти шаҳрдории Кӯлоб Абдураззоқ Хӯчамқулов ба «Азия-Плюс» дар ин робита иттилоъ дод, ки бо назардошти макони ҷойгиршавии бозор ва обуҳавои беҳад гарм, тасмим гирифта шудааст, ки то ахири рӯзи дигар бозор аз боқимондаҳои сӯхтор тоза ва партовҳо ба берун бароварда шаванд.

Ба гуфтаи вай, тибқи маълумоти ахири саҳеҳшуда, аз сӯхтор дар маҷмӯъ 163 фурӯшанда, аз ҷумла ҳудуди 50 нафар занон осеб дидаанд. «Ҳамаи онҳо тибқи шаҳодатнома ё патентҳои нозироти андоз фаъолият доштанд», - гуфт ӯ ва илова намуд, ки аз сӯхтор натанҳо маркази савдои «Шаҳбоз-С», ки пурра ба коми оташ рафт, балки марказҳои савдои хусусии «Алиҷон Шералӣ», «Баракат» ва як қисмате аз бозори «Саховат» низ хисорот бардоштанд.

Дар ҳамин ҳол, намояндагони «Тоҷикматлубот имрӯз итминон доданд, ки қисмати сӯхтаи муталлиқ ба онҳо дар бозорро аллакай то Иди Рамазон барқарор мекунанд.

Дар суҳбат бо хабарнигори «Азия-Плюс» раиси шаҳри Кӯлоб таъкид дошт, ки дар бораи сохтмони бозори нави наздишаҳрӣ дар мақомоти марбута қарор тасдиқ шуда, тамоми фурӯшгоҳҳо аз  маркази шаҳр тадриҷан ба ин бозори берун аз шаҳр кӯчонида мешаванд.