Як гурӯҳе аз соҳибкорони Чин бо вазъи заминҳои ноҳияи Қубодиён шинос шуданд.

Зимни нишасти матбуотӣ раиси ноҳияи Қубодиён Саъдуло Бекназаров дар ин робита изҳор намуд, онҳо бо вазъи заминҳои мавзеъи Юлдузқоқ, ки аслан бо пойгоҳҳои обкашӣ обёрӣ мешаванд, аз наздик шинос шудаанд. «Соҳибкорони чинӣ бо кори таҷҳизоти обкашии мо шинос гардида, ҳайрон шуданд, ки  то ба имрӯз мо аз дастгоҳҳои обкаши куҳнаи серхарҷи шӯравӣ истифода мебарем», - гуфт раиси ноҳия.

Бекназаров қайд кард, ки соли равон беш аз як ҳазор гектар замин  дар ноҳия бекор мондааст, ки сабаби кишт нашудани ин заминҳо норасоии об буда, дастгоҳҳои обкаш куҳнаю фарсуда ва ҳам норасоии қувваи корӣ имкон надодааст, то ки ин заминҳо кишту кор шаванд.

Ӯ ҳамчунин зикр кард, ки ҳоло бо соҳибкорони чинӣ ягон шартномаи мушаххасе ба имзо нарасидааст, вале умедворанд, ки онҳо ба ин мавзеъ мароқ зоҳир хоҳанд кард.

Бекназаров дар давоми сӯҳбаташ изҳор дошт, ки дар сурати сохтмони обанбори Кофарниҳони поён, ки лоиҳааш даврони шӯравӣ омода шудаву 30 дар сади корҳои сохтмониаш ба анҷом расонида шудаааст,  садҳо ҳазор гектар замин обёрӣ хоҳад шуд. «Умед дорем, ки ҳукумати ҷумҳурӣ баҳри амалишавии ин лоиҳа чораҳои зарурӣ меандешад», - афзуд раиси ноҳия.