Дар доираи чорабиниҳои нишасти сарони кишварҳои узви Созмони ҳамкории Шанхай, рӯзи 11-уми сентябр барои иштирокдорони нишасти созмон дар толори «Кохи Борбад» таҳти унвони «Шоми дӯстӣ» консерти пуршукӯҳ доир мегардад.

Зимни кори мизи гирд дар шаҳри Душанбе муовини вазири корҳои дохилии ҶТ Парвиз Давлатзода дар ин робита изҳор намуд, ки консерти мазкур тобишҳои нодири ҳунари ҳар кадоме аз мардуми кишварҳои узви созмонро таҷассум намуда, ба огаҳии бештар аз таърихи куҳан ва фарҳанги якдигар имконият медиҳад.

«Мо бояд ба фаъолияти дарозмуҳлат ва дақиқ оид ба таҳкими асосҳои маънавии ҳамкорӣ дар доираи СҲШ такя карда, тадбирҳои аз лиҳози маънавӣ ва фарҳангӣ наздикшавии мардуми кишварҳо ва болоравии эътимоди тарафайн миёни инсонҳоро таҳия намоем», - иброз дошт муовини вазир.

Дар робита ба нишасти СҲШ дар Душанбе (11-12-уми сентябр) П.Давлатзода ҳамчунин зикр кард, ки ин нишаст пойтахти Тоҷикистонро муддати 2 рӯз ба маркази рӯйдодҳои ҷаҳонӣ ва геополитикӣ табдил медиҳад. Қабл аз нишасти сарони кишварҳои узви СҲШ ҷаласаи навбатии иттиҳоди байнибонкӣ, Шӯрои корӣ ва ҳамоиши тиҷоратӣ баргузор мешавад.

Номбурда ҳамчунин илова намуд, ки барои инъикоси кори нишаст маркази матбуотӣ таъсис дода шуда, беш аз 500 нафар рӯзноманигорони ватаниву хориҷӣ номнавис шудаанд.