Сафири ИМА Сюзан М. Эллиотт маводҳои тиббиро барои сокинони вилояти Хатлон ба сардори раёсати ташкили хизматрасониҳои тиббӣ ба модарону кӯдакон  ва танзими оилаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон доктор Шерали Раҳматуллоев ба таври расмӣ супорид.

Бино ба иттилои сафорати ИМА дар Тоҷикистон, дар ин маросим намояндагони Оҷонсии ИМА оид ба рушди байналмилалӣ (USAID) ва созмони байналмиллалии “Ҳайати шафқат” низ дар якҷоягӣ бо намояндагони Ҳукумати вилояти Хатлон, ҳукуматҳои ноҳияҳо ва кормандони марказҳои саломатӣ ширкат варзиданд.

Дар чорабинии мазкур маводҳои тиббӣ минҷумла вазнченкунакҳо, мавод барои санҷиши фишори хун (тонометрҳо), стетоскопҳо, термометрҳо ва ғайра барои 355 муассисаҳои тандурустии деҳот бо мақсади беҳтар гардонидани ёрии аввалияи тиббӣ, махсусан ба модарон ва кӯдакон дар вилояти Хатлон тақдим гардиданд.  Ин маросим  аҳамияти хизматрасонии баландсифати тиббиро дар пешгирӣ ва табобати оқибатҳои норасоии ғизо дар вилояти Хатлон таъкид намуд. Таъмини асбобҳои тиббӣ бо дастгирии лоиҳаи USAID “Солимии модар ва кӯдак”, ки аз чониби созмони байналмилалии “Ҳайати шафқат” амалӣ мегардад, имконпазир гардид.

«Мо тасмим гирифтаем, ки сатҳи норасоии ғизо ва солимии кӯдакро тавассути сармоягузории соҳаи тандурустӣ беҳтар намуда, фардо шоҳиди рушди устувор ва нашъунамои иқтисоди ҷомеаҳои алоҳида, вилоят ва дар маҷмуъ миллат, гардем», қайд намуд сафир Эллиотт дар суханронии хеш.

Ҳукумати ИМА баҳри беҳтар намудани хизматрасонии тиббӣ дар ҳамроҳӣ бо шарикони хеш ва кормандони соҳаи тандурустии ноҳияҳо ва вилоят дар ҷомеаҳои камбизоаттарин фаъолияти хешро пиёда намудааст.  Диққати махсус ба модарони ҷавон ва кӯдакони хурдсол, ки дар зери хатари норасогии ғизо ва солимии ноустувор қарор доранд, дода мешавад. Ҳукумати ИМА тасмим гирифтааст, ки то анҷоми лоиҳа дар моҳи сентябри соли 2016 вазъи саломатӣ ва ғизои зиёда аз 300,000 занҳои қобили таваллуд ва 220,000 кӯдакони сини то панҷсоларо беҳтар гардонад.

Лоиҳаи USAID “Солимии модар ва кӯдак” яке аз лоиҳаҳои зиёди кӯмакрасон мебошад, ки амалӣ гаштани он бо шарофати кӯмакҳои мардуми ИМА тавассути USAID имконпазир гардидааст. Аз соли 1992 инҷониб, Сафорати ИМА дар Душанбе тавассути барномаҳои мухталиф ҷиҳати дастгирӣ намудани соҳаи амният, ниҳодҳои демократӣ, соҳаи ичтимоӣ ва рушди иқтисодии Ҷумҳурии Тоҷикистон маблағи беш аз 1 миллиард доллари амрикоро ҷудо намудааст.