Дар шабакаҳои иҷтимоӣ ба забони ӯзбекӣ навори видеои гусели кӯдак ба синфи якуми мактаб мавриди таваҷҷуҳ қарор гирифтааст. Навор дар Тошканд сабт гардида, сипас дар саҳифаи фейсбукии Uzbek Video  нашр шуд.

“Анъанаи нав. Волидон писари худро бо чунин тарз ба мактаб гусел мекунанд”, - гуфта мешавад дар матни ин навор.

Барои гусели фарзандашон ба мактаб волидон сабукрави махсус зинатёфтаро фармоиш додаанд. Хоҳари кӯдак аз даромадгоҳи хона то мошин назди пойи ӯ баргҳои гул мепартояд. Ҳамчунин даромадгоҳ ва ҳавлии хона оро дода шудааст.

“Азия-Плюс” огаҳӣ ёфт, ки дар Душанбе низ чанде аз волидон фарзандони худро бо шукӯҳу шаҳомати хосса ба мактаб гусел намуданд, лекин манбаи хабар сурат ва навори видеои онро пешниҳод накард.

Дар шабакаи интернет матолиб дар бораи чӣ гуна бори нахуст фарзандони худро ба мактаб гусел кардани шахсони маъруф низ ба нашр расидааст.

Аз ҷумла, чӣ тавр Ҳунарманди халқии Русия Филипп Киркоров фарзандони худ - Мартинаи 6-сола ва Алла-Викторияи 7-соларо ба мактаб гуселонидааст. Навори видеои ҷашни Рӯзи донишро ҳунарманд дар саҳифаи Instagram нашр кардааст.

“Ана имрӯз ҳам фаро расид! Фарзандонамро дар деҳаи хурдамон ба мактаб бурдам. Мартинаро ба синфи якум ва Алла-Викторияро ба синфи дуюм. Тамоми шаб мижа таҳ накарданд, тайёрӣ диданд, дар ҳаяҷон буданд, ташвишу изтироб доштанд... Азизонам, бо оғози ҳаёти нав ва албатта, бо ҷашни Рӯзи дониш табрик мегӯям!”, - навиштааст Киркоров.

Шоҳзода Уилям ва малика Кейт Миддлтонҳо фарзандони худро хоксорона ба мактаб гусел карданд. Навори видео дар аккаунти расмии Кохи Кенсингтон рӯзи 5 сентябр нашр шуда, онро қариб 5 млн. нафар тамошо кардаанд.

Дар зернавишти видео гуфта мешавад, ки малика Шарлотта ба синфи якуми мактаби Thomas's Battersea рафта, писари калонӣ - шоҳзода Ҷорҷ ба синфи сеюм гузаштааст. Дар навор дида мешавад, ки чӣ гуна фарзандони онҳо бо муаллима шинос мешаванд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.