Шурӯъ, аз субҳи 10-уми майи соли равон нархи мусофиркашонии микроавтобусҳои дохилишаҳрӣ дар шаҳри Хуҷанд гарон шуд.

Шӯҳрат Аҳмадҷонов, сардори Раёсати нақлиёти автомобилӣ ва хизматрасонии логистикӣ дар вилояти Суғд дар суҳбат бо “Азия-Плюс” сабаби гарон шудани роҳкиро боло рафтани нархи сӯзишворӣ арзёбӣ кард.

"Ронандагон ба ширкатҳои нақлиётӣ шикоят кардаанд, ки ба сабаби гарон шудани гази моеъ (6,5-7 сомонӣ) ва сӯзишвории дизелӣ (11-11,50 сомонӣ) хароҷоташонро рӯйпӯш карда наметавонанд. Дар асоси муроҷиати ширкатҳои мусофиркашонӣ мо ба ҳукумати Суғд мактуб фиристодем. Дар ҷаласаи ҳукумат хулоса шуд, ки барои рӯйпуш кардани хароҷот роҳкиро бояд 2,6 сомонӣ кунем, аммо 2 сомонию 50 дирам муайян кардем”, - гуфт Аҳмадҷонов.

Ба таъкиди ӯ, нархномаи нав танҳо ба микроавтобусҳои дихилишаҳрии Хуҷанд дахл дорад, нархномаи микроавтобусҳои беруназшаҳрӣ (ба мисоли “Хуҷанд-Ғафуров”, “Хуҷанд-Бӯстон”) ва ё аз Хуҷанд ба дигар шаҳру ноҳияҳо бетағйир боқӣ мемонад.

Дар шаҳри Хуҷанд 12 ширкати нақлиётии дохилишаҳрӣ ва 16 хатсайри мусофиркашонӣ мавҷуд аст. Масъулин мегӯянд, хароҷоти сӯзишворӣ дар нақлиёти ҷамъиятии дохилишаҳрӣ бисёр аст. Нақлиёт суст ҳаракат мекунад ва исти зиёд дорад, ки дар суръати суст сарфаи сӯзишворӣ ҳам зиёд мешавад.

Номбурда афзуд, ки ин нархнома ба автобусҳои ҷамъиятӣ дахл надорад, вале барои баланд бардоштани роҳкиро онҳо раёсат ба масъулин пешниҳод кардааст

"Дар пайи боло рафтани маводи сӯзишворӣ корхонаи автобусҳои ҷамъиятии шаҳри Хуҷанд низ пешниҳод додаанд, ки нархи хизматрасониро 50 дирам боло бардорем. Ин пешниҳод ҳоло дар марҳилаи тасдиқ қарор дорад. Нархи мусофиркашонӣ тариқи автобусҳои давлатӣ аз соли 2018 ба ин тараф боло нарафтааст ва ҳоло хизматрасонии дохилишаҳрӣ тавассути онҳо 1 сомонӣ аст”, - мегӯяд Шуҳрат Аҳмадҷонов.

Ин бори дувум аст, ки бо сабаби гарон шудани нархи сӯзишворӣ мақомоти вилояти Суғд роҳкироро боло мебаранд. Бори аввал онҳо,  1-уми сентябри соли гузашта роҳкиро аз 1 сомонию 50 дирам то 2 сомонӣ гарон карда буданд.