Арабистони Саудӣ ва боз шаш кишвари Халиҷи Форс барои қабули шаҳрвандони Қирғизистон ба кор изҳори омодагӣ кардаанд. Дар ин бора як қатор расонаҳои Қирғизистон бо истинод ба Вазорати меҳнат, таъминоти иҷтимоӣ ва муҳоҷират хабар медиҳанд.
Гуфта мешавад, Қирғизистон бо Вазорат ва ширкатҳои хусусии кишварҳои Халиҷи Форс дар бораи қонунӣ бо кор таъмин кардани қирғизистониҳо шартнома ба имзо расонидааст.
Арабистони Саудӣ, Баҳрайн, Уммон, Амороти Муттаҳидаи Араб (АМА), Қатар, Кувейт ва Урдун аз ҷумлаи кишварҳое зикр шудаанд, ки муҳоҷирони меҳнатии қирғиз метавонанд ба онҳо ба кор раванд.
Бино ба маълуомти Вазорат, дар ин кишварҳо 815 ҷойи корӣ мавҷуд буда, ҷониби даъваткунанда хароҷот барои раводид ва маблағи билети ҳавопайморо пардохт мекунад.
Талаботи асосии кишварҳои қабулкунанда донистани забони англисӣ дар сатҳи миёна ва синни аз 18 то 35-сола мебошад.
Дар робита ба Тоҷикистон метавон гуфт, ки кишвар дар роҳи гуногунсамт кардани содироти қувваи корӣ пешрафт надорад.
Кишвари асосие, ки айни замон муҳоҷирони меҳнатии тоҷик ба он ҷо ба кор мераванд, Русия боқӣ мемонад.
Ду сол пеш дар Вазорати меҳнат, муҳоҷират ва шуғли аҳолии Тоҷикистон ҷаласаи якуми гурӯҳи корӣ оид ба татбиқи созишнома бо ҳукумати Қатар баргузор шуд.
Зикр гардида буд, ки Қатар ба муҳоҷирон аз Тоҷикистон дар соҳаҳои сохтмон ва сайёҳӣ, инчнуин бахши хидматрасонии иҷтимоӣ кор пешниҳод мекунад.
Чанде пеш гурӯҳи аввалини коргарон ба Кореяи Ҷанубӣ фиристода шуд.
Гуфтушунидҳо бо дигар кишварҳо идома дорад, лекин ба ҷуз Русия, ба дигар кишварҳо ба таври оммавӣ рафтани муҳоҷирони тоҷик ба назар намерасад.
Руcский