Бино ба маълумоти Агентии обуҳавошиносии ҷумҳурӣ, моҳи декабр дар Тоҷикистон поинравии ҳарорат дар назар аст. Лекин миқдори боришот аз меъёр зиёд намешавад.

Дар Душанбе ва Ноҳияҳои тобеи марказ (НТМ) аввали моҳи декабр боришот ва ҳавои камабр дар назар аст. Дар ноҳияҳои ҷудогона боришот (борону барф) баъзан пуршиддат мешавад. Рӯзона ҳарорат дар сатҳи аз +6 до +15 ва шабона аз 1 то 6  дараҷа гарм боқӣ мемонад. Шамол бештар аз ғарб бо суръати 4-9 м/с мевазад.

Дар ноҳияҳои кӯҳии НТМ ва ноҳияҳои ғарби ВМКБ ҳарорат баъзан 1 дараҷа поинтар аз меъёри иқлимӣ пасттар шуда, 1-6 дараҷа хунук мешавад. Дар ҳамин ҳол, давоми моҳ тағйирёбии ҳарорат рӯзона аз 1-6 дараҷа гарм то 2-7 дараҷа хунук, шабона аз 4-9 то 12-17 дараҷа гарм пешбинӣ мешавад. Миқдори моҳонаи боришоти атмосферӣ дар ҳудуди меъёр пешбинӣ гардида, баъзан босуръат шудани вазиши шамол аз ғарб то 13-18 м/с ва туман аз эҳтимол дур нест.

Дар вилояти Хатлон ва ноҳияҳо водии НТМ ҳарорат 4-5 дараҷа ва ноҳияҳои доманакӯҳ - 2-4 дараҷа гармро ташкил медиҳад. Дар даҳрӯзаи аввали моҳ ҳарорат дар водиҳо рӯзона то 9-14 дараҷа гарм, дар баъзе ноҳияҳои ҷанубӣ то 12-17 дараҷа гарм, шабона +2+7, дар доманакӯҳҳо рӯзона то +3+8, шабона -3+2  дар назар дошта шудааст.

Ҳавои аввали моҳи декабр қариб аз тирамоҳ фарқ накарда, танҳо каме хунуктар мешавад
Сурат аз podrobno.uz

Миқдори боришот аз меъёр паст пешбинӣ шуда, шиддатёбии вазиши шамол аз самти ғарб бо сурати то 17-22 м/с  дар назар аст ва дар баъзе ноҳияҳо тормеғ мефарояд.

Дар вилояти Суғд ҳарорати миёнаи моҳонаи ҳавои атмосферӣ дар ҳудуди меъёр, дар баъзе ноҳияҳо аз меъёри иқлимӣ 1 дараҷа паст пешгӯӣ шуда, дар ноҳияҳои водӣ 1+3 дараҷа гарм, дар ноҳияҳои кӯҳӣ 2-4 хунукро ташкил медиҳад. Дар даҳрӯзаи аввали моҳ ҳарорат дар водиҳо рӯзона 1-6 гарм, шабона -4+1, дар ноҳияҳои кӯҳӣ рӯзона то 0-5 дараҷа хунук, шабона 5-10 дараҷа хунук  дар назар дошта шудааст. Дар даҳрӯзаҳои дуюм ва сеюми моҳ пастшавии ҳарорати ҳаво пешгӯӣ мешавад.

Дар ноҳияҳои шарқи ВМКБ ҳарорат нисбатан хунуктар мешавад. Ҳарорат дар баъзе минтақаҳо аз меъёри иқлимӣ 1 дараҷа паст пешгӯӣ шуда, 14-19 дараҷа хунукиро ташкил медиҳад. Дар даҳрӯзаҳои аввал ва дуюми моҳ ҳарорати ҳаво шабона 15-20 дараҷа хунук ( дар мавзеи Булункӯл то 22-27 дараҷа хунук),  рӯзона 2-7 дараҷа хунук ( дар мавзеи Булункӯл то 6-11 дараҷа хунук) пешгӯӣ мешавад. Миқдори моҳонаи боришоти атмосферӣ дар ҳудуди меъёри иқлимӣ пешгӯӣ мешавад.

Дар Telegram, Facebook, Instagram, OK ва ВК бо мо бимонед.