Шаҳрдории толибон дар Кобул дар ҳама 22 ноҳияи шаҳри Кобул тамоми аксҳои занону духтаронро аз дару девори ороишгоҳҳо, мағозаҳо ва ресторану овезаҳои таблиғотӣ  канда ва поксозӣ мекунад. Толибон гуфтаанд, ки ин аксҳо мухолифи шариати исломиянд. 

Неъматулло Борикзай, сухангӯйи шаҳрдории Кобул ба шабакаи “Тулуънеюс” гуфтааст, ки ин корро онҳо бар асоси ҳидояти кобинаи ҳукумати Толибон мекунанд.

“Тамоми тасовири ғайришаръӣ, ки дар дару деворҳо, баннерҳо ва ҷойҳои дигаре, ки вуҷуд доранд, бояд аз байн бурда шаванд”, - гуфтааст Борикзай.

Шоиста Сафӣ, яке занҳоеи Кобул, ки зиндагии хонаводаии 10-нафарияшро аз ҳисоби кор дар ороишгоҳ таъмин мекунад гуфтааст, чанд рӯз пеш намояндаи толибон омада гуфтанд, ки ин аксҳоро биканед, аммо худашон ранг (спрей) доштанд, ки аксҳоро сиёҳ карданду рафтанд.


«Ин иқдоми ҳукумат маҳдудият бар кори занон аст. Мо ҳарос дорем, ки фардо биёянд ва дӯконро ҳам қуфл кунанд», - гуфтааст Шоиста.

Баъзе аз фаъолони ҳуқуқи зан дар Афғонистон поксозии ин аксҳоро маҳдудиятҳои нав дар фаъолиятҳои занон дар ҷомеа унвон кардаанд ва аз ин амалкарди толибон интиқод мекунанд.

Ин дастури тозаи толибон дар ҳолест, ки ҷомеаи ҷаҳонӣ  ин гурӯҳро ба нақзи густардаи ҳуқуқи занон дар Афғонистон муттаҳам мекунанд, аммо сарони ҳукумати сарпарасти толибон борҳо гуфтаанд, ки ба ҳуқуқи занон дар чаҳорчӯбаи ислом пойбанданд.

Шаҳрдории Кобул гуфтааст, ки “аз диди аморати исломӣ, вуҷуди тасвирҳои бонувон дар маҳзари ом мухолиф бо усули исломӣ аст”.

Ҳар он чи дар Афғонистон рух медиҳад, метавонед мустақиман дар сужаи мо -  "Афғонистон" бихонед.

Дар TelegramFacebookInstagramOK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути ViberTelegramWhatsappImo ба рақами +992 93 792 42 45 фиристед.