Ҳайати Толибон дар ҷараёни музокирот дар Маскав ба Русия пешниҳод кардааст, ки ба ҷониби Афғонистон ҳудуди 1 миллион баррел нафт бифурӯшад.

Дар ин бора "Коммерсант" бо истинод ба Нуриддин Азизӣ, вазири саноат ва савдои ҳукумати Толибон хабар медиҳад.

Ӯ афзудааст, ки Толибон дар сурати таваҷҷуҳи Русия ба “баъзе маҳсулоти Афғонистон” бар ивази манобеъи энержӣ гузинаи тиҷорати додугирифтро (бартерӣ) баррасӣ мекунанд.

«Мо ба Русия тақрибан 1 миллион (баррел. - «Коммерсант») пешниҳод кардем, агар бештар фиристад, пас ин мушкил нест... Мо инчунин мехоҳем гузинаи савдои додугирифтро баррасӣ кунем, ба шарте, ки Русия ба ягон навъи маҳсулоти Афгонистон таваҷҷӯҳ кунад.»,— иброз дошт Нуриддин Азизӣ дар суҳбат бо хабарнигори РИА Новости.

Моҳи июни соли равон дар ҳамоиши байналмилалии иқтисодии Санкт-Петербург (SPIEF) раиси Палатаи савдо ва саноати Афғонистон Муҳаммадюнус Ҳусейн аз нақшаи Афғонистон барои харидории 5 ҳазор тонна нафт ва 2 миллион тонна ғалла аз Русия хабар дода буд.

Ёдовар мешавем, ки ҳайати Толибон барои музокирот дирӯз, 14 август вориди Маскав шуд.

Сарфи назар аз он, ки мақомоти Афғонистонро ҷунбиши террористии Толибон ташкил медиҳанд, сафири Русия дар Кобул гуфт, ҷониби Русия бояд бо Толибон дар масоили марбут ба манфиатҳои Маскав ҳамкорӣ кунад. Вай пешниҳод кард, ки ҳамкорӣ бо Толибонро ҳамчун як воқеият бояд қабул кард, ки "аз он касе гурехта наметавонад".

Бояд гуфт, ки аз суқути Афғонистон имрӯз 15 август як соли пурра шуд ва то имрӯз ягон давлат ҳукумати Толибонро ба расмият нашинохтааст.

Ҳар он чи дар Афғонистон рух медиҳад, метавонед мустақиман дар сужаи мо -  "Афғонистон" бихонед.

Дар Telegram, Facebook, Instagram, OK ва ВК бо мо бимонед.