Владимир Путин, раиси ҷумҳури Русия бо имзои як қарор дар ҷанги кишвараш алайҳи Украина оташбаси серӯза эълон кардааст.

Сомонаи расмии раиси ҷумҳури Русия ин қарорро нашр кардааст. Дар он зикр мешавад, ки “бо назардошти ҷанбаи инсондӯстӣ ва дар арафаи 80-солагии Рӯзи Ғалаба, аз соати 00:00 аз 7 ба 8-уми май то соати 00:00 аз 10 ба 11-уми май, ҷониби Русия оташбас эълон менамояд. Дар ин давра тамоми амалиёти ҷангӣ қатъ хоҳад шуд”.

“Русия чунин меҳисобад, ки ҷониби Украина низ аз ин иқдом пайравӣ кунад. Дар сурати нақзи оташбас аз ҷониби Украина, артиши Русия посухи мувофиқ хоҳад дод”, - таъкид мегардад дар хабар.

Мавқеи ҷониби Украина ба ин “қарори оташбаси Русия” ҳоло маълум нест. Мақомоти расмии ин кишвар қарори оташбасро шарҳ надодаанд.

Ҳамчунин, бояд гуфт, дар изҳороти оташбаси нашркардаи сомонаи расмии раиси ҷумҳури Русия таъкид мешавад, ки “ҷониби Русия бори дигар омодагии худро барои музокироти сулҳ бидуни шартҳои пешакӣ, ки ба бартараф кардани сабабҳои аслии буҳрон дар Украина ва ҳамкории созанда бо шарикони байналмилалӣ равона шудааст, изҳор медорад”.

Ёдовар мешавем, ки ҳафтаи гузашта Русия эълон кард, ки аз соати 18:00 -и 19-ум то соати 00:00-и 21-уми апрел (ба вақти Маскав) ба муносибати иди "Пасха" тамоми намуди амалиёти ҷангӣ дар Украинаро қатъ мекунад. Он вақт Украина аз ин тасмим ҷонибдорӣ карда буд.

Аммо баъди гузашти ин муҳлат, ҳарду ҷониб ҳамдигарро барои нақзи оташбас гунаҳкор карданд.

Дар Telegram, Facebook ва Instagram бо мо бимонед.