Ҷасади муаллими Донишгоҳи давлатии тиҷорати Тоҷикистон, ки ду моҳ  пеш аз сӯйи подполковники ВКД рабуда шуда буд, то ҳол пайдо нашудааст. Як ҷасаде, ки ҳангоми ҷустуҷӯ пайдо шудааст, ба муаллим тааллуқ надоштааст.

Дар ин бора Юсуф Раҳмон, додситони кулли Тоҷикистон имрӯз, 15-уми август, зимни нишасти матбуотӣ иттилоъ дод.

Бояд гуфт, ки Исмоилҷон Раҳмонов, устоди Донишгоҳи давлатии тиҷорати Тоҷикистон 12-уми июни соли 2023 аз ҷониби Акмал Юсуфзода, подполковники Раёсати мубориза бо ҷиноятҳои муташаккили ВКД, маъруф ба УБОП ва Исмоил Шукуров, як хеши ӯ рабуда шуд.

Додситонии кулли кишвар пас аз чанд рӯзи ҳодиса расман иттилоъ дод, ки “Юсуфзода А.Ҳ. шаби 12 июни соли 2023 соати 23:20 дақиқа аз ҳиссиёти рашк бо хешовандаш Шукуров И.М. устоди Донишгоҳи давлатии тиҷорати Тоҷикистон Раҳмонов Исмоилҷон Қаҳоровичро дар кӯчаи Борбади шаҳри Душанбе, наздикии қурутобхонаи “Муслим” бо истифодаи зӯроварӣ ба автомашинаи хизматияш, ки тамғаи “Хундай Аксент”, рангаш сафед, аломати қайди давлатиаш 030UD01 мебошад, савор карданд. Онҳо  дастони муаллимро баста, дар километри 118 шоҳроҳи Душанбе-Хуҷанд, воқеъ дар деҳаи Чореи ноҳияи Айнӣ бо мақсади ба қатл расонидан ӯро ба дарёи Фон партофта, аз ҷойи ҳодиса ғайб задаанд”.

Юсуф Раҳмон
vecherka.tj

Ҳафтаи гузашта Рамазон Раҳимзода, вазири корҳоли дохилӣ низ эътироф кард, ки нафари ин ҷиноятро содиркарда воқеан корманди Раёсати мубориза бо ҷиноятҳои муташаккили ВКД буд.

Бо гузашти ду моҳ аз ин ҳодиса, додситони кулли кишвар мегӯяд, ки то ҳол ҷасади муаллимро наёфтаанд ва тафтишот идома дорад.

“Як ҷасадро пештар аз дарёи Зарафшон ёфтем ва ташхис муаллими донишгоҳ будани онро тасдиқ накард”, - гуфт Юсуф Раҳмон.

Дар ҳамин ҳол, наздикони Исмоил Раҳмонов аз он нигаронӣ доранд, ки бо гузашти муддати зиёд аз рабуда шудани ӯ, додситонӣ онҳоро ба парванда шинос намекунад.

Пайвандони ин муаллим ба расонаҳо гуфтаанд, ки чанд маротиба барои шинос шудан бо парванда ба Додситонии кул рафтаанд, аммо муваффақ нашудаанд.

“Дар ин бора хаттӣ ариза навиштем, ки аз ҷараёни тафтиши парванда моро огоҳ кунанд. Интизорем чӣ посух медиҳанд. То ҳол аз Исмоил ҳеҷ хабаре нест, зиёд мехоҳем донем, ки тафтишот чиро маълум кардааст”, - гуфтааст яке аз пайвандони Исмоил Раҳмонов, бо шарти ошкор нашудани номаш.

Бояд гуфт, ки аз ҳодисаи рабудани муаллими ДДТТ дар моҳи июни соли ҷорӣ аввалин шуда Радиои Озодӣ иттилоъ нашр намуд. Баъдан, бо гузашти чанде мақомоти Тоҷикистон ҳодисаро расман тасдиқ карда, зикр намуданд, ки онро тафтиш доранд.

Дар Telegram, Facebook, Instagram, OK ва ВК бо мо бимонед.