Рӯзномаи афғонистонии “8-и субҳ” бо такя ба манобеи худ баъзе ҷузъиёти сафари намояндагони Толибон* ба Тоҷикистонро ифшо кардааст. Мақомоти Тоҷикистон то ҳол ҷузъиёти ин сафарро шарҳ надодаанд.
Ба гуфтаи манобеи “8-и субҳ”, ҳафтаи гузашта ҳайати Толибон таҳти раҳбарии Муҳаммад Мӯсо, раиси умури молии вазорати хориҷаи Афғонистон, бо раводиди тиҷоратӣ аввал ба Душанбе ва пас аз он, ба Бадахшони Тоҷикистон сафар кардаанд.
Маълум нест, ки ҳамроҳи Муҳаммад Мӯсо чанд нафар намояндагони Толибон ба Тоҷикистон омадаанд, вале гуфта мешавад, ки “ҳайати Толибон барои гуфтугӯ бо мақомоти Тоҷикистон ба ин кишвар сафар кардааст” ва ҳадафи асли интиқоли консулгарӣ ба дасти намояндаи Толибон будааст.
“Ҳадафи сафари ҳайати Толибон ба Тоҷикистон музокирот дар бораи интиқоли Консулгарии Афғонистон дар Хоруғ буд. Ҳоло муайян нест, ки ду тараф дар мавриди интиқоли консулгарӣ ба тавофуқи муқаддамотӣ расидаанд ё на”, - навиштааст рӯзнома.
Таъкид мешавад, ки теъдоде аз дипломатҳои собиқи Афғонистон барои ин сафари намояндаи Толибон ба Тоҷикистон замина фароҳам овардаанд.
Вазорати корҳои хориҷии Тоҷикистон то ба ҳол сафари намояндагони Толибон ба Тоҷикистонро шарҳ надодааст. Масъули Вазорати корҳои хориҷии Тоҷикистон зимни суҳбати телефонӣ бо “Asia-Plus” ҳозир нашуд, ки ин хабарро шарҳ диҳад.
Як масъули Сафорати Афғонистон дар Тоҷикистон дар тамоси телефонӣ бо мо омадани намояндагони Толибон ба Душанберо қотеона рад кард, вале гуфт, ки “сафари Толибон ба Бадахшон масъалаи дигар аст”.
“Дар Сафорати Афғонистон дар Тоҷикистон ва Консулгарии Афғонистон дар Хоруғ ягон тағйроте нест. Сафорат ва консулгарӣ бо ҳамон кормандони пешинаашон кор карда истодаанд. Интиқоле ҳам сурат нагирифтааст”, - афзуд ин масъули сафорат.
Ёдовар мешавем, ки аввалин бор Қаҳҳор Балхӣ, сухангӯи сарпарасти Вазорати корҳои хориҷаи Афғонистон рӯзи 25-уми март дар Твиттери худ навишт, ки як ҳайати Толибон аз консулгарии Афғонистон дар шаҳри Хоруғи Тоҷикистон дидан кардаанд.
“Ин ҳайат зимни арзёбии умури консулгарӣ, таъмири онро низ аз наздик дид ва арзёбии хешро ҷиҳати бозсозии он бо мақомҳои Вазорати умури хориҷӣ шарик намуд. Таъмири консулгарии Афғонистон дар Хоруғ дар натиҷаи барфкӯчи охир осеб дидааст”, - навишт ин масъули Толибон.
Тоҷикистон бо Толибон робитаи дипломатӣ надорад ва роҳбарияти Тоҷикистон аз сиёсатҳои ин гурӯҳ оид ба ташкили ҳукумат ва риояи нагардидани ҳуқуқи инсон интиқод мекунад. Аз ин лиҳоз, маълум нест, ки ин ҳайати Толибон аз чӣ тариқ вориди Тоҷикистон шудаанд ва ба шаҳри Хоруғ рафтаанд.
Ёдовар мешавем, ки Толибон дар аксар кишварҳои ҷаҳон, аз ҷумла Тоҷикистон гуруҳи террористӣ эътироф шудааст. Ин гуруҳ моҳи августи соли 2021, пас аз 20 соли ҷанг бо нерӯҳои НАТО вориди Кобул шуда, қудратро дар Афғонистон ғасб кард.
Ҳамакнун, беш аз якуним сол мешавад, ки ин гуруҳ дар Афғонистон давлатдорӣ мекунанд, вале то кунан аз сӯйи ҳеҷ кишваре ҳукумати таъсиснамудаи онҳо ба расмият шинохта нашудааст.
Бо ин вуҷуд, баъзе аз давлатҳо, аз ҷумла Русия, Чин, Эрон ва АМА тайи моҳҳои охир ихтиёри сафорати Афғонистонро ба намояндагони Толибон доданд. Баъзе аз давлатҳои дигар бошад, бо ин гуруҳ равобит барқарор карда, вориди гуфтугӯ низ шудаанд.
*Дар Тоҷикистон гурӯҳи террористӣ эътироф шудааст
Ҳар он чи дар Афғонистон рух медиҳад, метавонед мустақиман дар сужаи мо - "Афғонистон" бихонед.
Дар “мардикорбозор”-и Душанбе чӣ мегӯянду чӣ гуна корҳо пайдо мекунанд?
Рамазон Раҳимзода бо Якоб Схермерс истирдоди шахсони дар ҷустуҷӯ қарордоштаро баррасӣ кардааст
Чупик: "Аз пайи тоҷикон шаҳрвандони Ӯзбекистону Қирғизистонро ҳам ба Русия роҳ намедиҳанд"
Пуштибони Муъмину Лоиқу Бозор. Мирзо Турсунзода ва нақши ӯ дар адабиёт ва тарбияи истеъдодҳо
Аз қитъаи замин то шаҳодатномаи ронандагӣ. Чаро ваъдаҳои мақомот ҷавононро ба хидмати ҳарбӣ дилгарм намекунад?
“Шоҳ” ва ситораҳои тобони ҷудои ҷаҳон ба Душанбе омаданд. Онҳо дар "Dushanbe Grand Slam 2024” иштирок мекунанд
Ҳаҷми истеҳсоли маҳсулоти кишоварзӣ дар Тоҷикистон зиёд шуд
БИР ва фондҳои рушди араб барои маблағгузорӣ ба неругоҳи “Роғун” 550 млн доллар ҷудо мекунанд
Марказҳои тестии Русия дигар аз муҳоҷирон имтиҳон қабул намекунанд. Акнун дар куҷо ва чӣ хел онро бояд супорид?
Нақшаи даъвати ҳарбӣ 70% иҷро шуд. “Облава” аз байн рафт?
Кулли ахбор
Авторизуйтесь, пожалуйста