Иҷлосияи хотимавии 22-юми Маҷлиси миллии Маҷлиси Олии Тоҷикистон даъвати панҷум имрӯз, 19-уми март доир мегардад. Дар ин бора ба “Азия-Плюс” ёвари раиси палатаи болоии парлумони ҷумҳурӣ Наврӯз Қурбонзода хабар дод.

Дар иҷлосия доир ба фаъолияти даъвати ҳозираи Маҷлиси миллӣ раиси палата Маҳмадсаид Убайдуллоев гузориш медиҳад.

Ба гуфтаи Қурбонзода, дар ҳамин ҳол, ваколатҳои аъзои Маҷлиси миллии даъвати кунунӣ то ба кор шурӯъ намудани Маҷлиси миллии тозаинтихоб, ки нимаи моҳи апрел дар назар аст, амал хоҳад кард.

Ба иттилои манбаъ, зимни маърӯза дар кори иҷлосия Маҳмадсаид Убайдуллоев, ки аз замони таъсиси он мудати 20 сол (аз моҳи марти соли 2000 то марти соли 2020) роҳбарии ин палатаи парлумонро ба уҳда дошт, аз бурду бохти фаъолияти Маҷлиси миллӣ тӯли панҷ соли охир натиҷагирӣ мекунад.

Ғайр аз ин, имрӯз аъзои Маҷлиси миллӣ кодексҳои қаблан аз ҷониби палатаи поёнии парлумон тасдиқшударо “Дар бораи нақлиёти автомобилӣ”, “Дар бораи об” ва ғайраро баррасӣ мекунанд.

Прокурори генералии Тоҷикистон Юсуф Раҳмон назди аъзои Маҷлиси миллӣ доир ба риояи қонуният дар кишвар маърӯза мекунад.

Дар иҷлосияи имрӯза як қатор амру фармонҳои президент дар бораи таъини муовинони нави прокурори генералии Тоҷикистон низ тасдиқ мешаванд.

Интихоби аъзои нави Маҷлиси миллии Маҷлис Олии Тоҷикистон рӯзи 27-уми март баргузор мешавад.

Ёдрас мекунем, ки 25 нафар аъзои палатаи болоии парлумонро вакилони маҷлисҳои маҳаллӣ (5-нафарӣ аз ВМКБ, Суғд, Хатлон, Душанбе ва ноҳияҳои тобеи марказ) интихоб карда, 8 узви Маҷлиси миллиро президенти Тоҷикистон таъин мекунад. Собиқ президентҳои Тоҷикистон бо хоҳиши худашон метавонанд якумрӣ узви палатаи болоии парлумони ҷумҳурӣ бошанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.