Исломиддин Раҳматов, як зодаи 23-солаи Тоҷикистон, ки дар сафи нерӯҳои мусаллаҳи Русия алайҳи Украина меҷангид, кушта шудааст. Дар ин бора маъмурияти шаҳри Юрйев-Полскии вилояти Владимири Русия хабар дода, гуфтааст, ки ин зодаи Тоҷикистон рӯзи 26-уми сентябр дар ин шаҳр ба хок супорида шуд.

Ба гуфтаи манбаъ, Исломиддин соли 2002 дар Тоҷикистон ба дунё омада, пасон ба Русия кӯчидааст. Ӯ барои хидмат дар Вазорати дифои Русия бо ин ниҳод шартнома баста, дар артиш дар рутбаи сарбози калони иктишофӣ хидмат мекардааст.

Дар мавриди марги Исломиддин Раҳматов ҷузъиёти дигаре нашр нашудааст. Фақат гуфта мешавад, ки ӯ моҳи август “ҳангоми иҷрои супоришҳое дар ҷараёни амалиёти махсуси ҳарбӣ (мақомоти Русия ҷанги зидди Украинаро чунин ном мебаранд) дар қаламрави Украина, ЛНР, ДНР" кушта шуд.

Теъдоди мушаххаси тоҷикону тоҷикистониёне, ки дар артиши Русия зидди Украина меҷанганд, маълум нест. Дар ҳамин ҳол, ба гузориши тарҳи давлатии “Зистан мехоҳам"-и Украина, 930 тоҷикистонӣ аз оғози ҳамлаи Русия ба Украина, аз тарафи Русия ба ҷанг рафта, тақрибан 200 нафарашон кушта шудаанд.

Аз ин пештар, дар як таҳқиқоти журналистии ББС ва “Медиазона” зикр мешуд, ки 72 шаҳрванди Тоҷикистон аз тарафи Русия ба ҷанги Украина рафта, кушта шудаанд, ки ин дар миёни хориҷиёни кушташуда дар ин ҷанг, ки ҳуввияташон аллакай мушаххас шудааст, аз ҳама бештар мебошад.

Пештар аз ин низ чанд нафар зодагони Тоҷикистон дар ин ҷанг ҷон бохтаву ҷасади онҳо ба ватан оварда шуда буданд.

Тоҷикистон то ба ҳол дар бораи ширкат ва марги шаҳрвандонаш дар ҷанги Украина вокуниши расмӣ накардааст.

Ҳарчанд, ҳанӯз аз оғози ҷанги Русия дар Украина ва ба такрор аз шаҳрвандонаш хост, дар ин ҷанг иштирок накунанд, зеро он паёмади ҳуқуқӣ дорад ва муҷозот хоҳанд шуд.

Ёдовар мешавем, ки Русия пас аз оғози ҷанг дар Украина ба таҷриҷ ба нерӯ эҳтиёҷ пайдо карда ва дар пайи ин ба ҷалби шаҳрвандони хориҷӣ, аз ҷумла шаҳрвандони кишварҳои Осиёи Марказӣ бо фиреб, таҳдид, фишор ва сӯйистифода аз вазъи танги онҳо дар муҳоҷират, ба артиш ва ҳамин тариқ, ба ҷанг шурӯъ намуд.

Русия ҳеҷ гоҳ пинҳон накардааст, ки шаҳрвандони кишварҳои дигар, аз ҷумла Тоҷикистонро барои имзои шартнома бо артишаш ва минбаъд ҷанг дар Украина ҷалб мекунад.

Мувофиқи иттилои Кумитаи тафтишотии Русия ба ҳолати июни соли 2024, зиёда аз 10 ҳазор муҳоҷири меҳнатӣ, ки шаҳрвандии Русияро гирифтаанд, барои иштирок дар амалиётҳои ҷангӣ дар Украина фиристода шудаанд.

Дар Telegram, Facebook ва Instagram бо мо бимонед.