Раиси шаҳри Душанбе Рустами Эмомалӣ аз Агентии назорати давлатии молиявӣ ва мубориза бо коррупсияи Тоҷикистон дархост кардааст, ки фаъолияти молиявию хоҷагидории мақомоти шаҳрдориро санҷиш намояд. Дар ин бора сомонаи расмии ин ниҳод хабар медиҳад.

Дархости мазкур бо мақсади таъмини шаффофият ва самаранокии истифодаи мақсадноки маблағҳои буҷетии мақомоти иҷроияи ҳокимияти давлатии шаҳри Душанбе равона шудааст.

“Раиси шаҳри Душанбе муҳтарам Рустами Эмомалӣ бо мақсади таъмини шаффофият ва самаранокии истифодаи мақсадноки маблағҳои буҷетии мақомоти иҷроияи ҳокимияти давлатии шаҳри Душанбе, ба Агентии назорати давлатии молиявӣ ва мубориза бо коррупсияи Ҷумҳурии Тоҷикистон, ҷиҳати санҷиши фаъолияти молиявию хоҷагидории мақомот дар соли 2022 дархост ирсол намуданд”, - гуфта мешавад дар хабари нашргардида.

Ин маротибаи аввал нест, ки раиси шаҳри Душанбе аз ин мақоми тафтишотӣ санҷиши фаъолияти молиявиии ниҳоди зери роҳбариашро дархост мекунад.

Солҳои қаблӣ низ Рустами Эмомалӣ аз Агентии назорати давлатии молиявӣ ва мубориза бо коррупсия айнан чунин хоҳишро карда буд, аммо то кунун натиҷаи санҷишҳои қаблӣ расонаӣ нагардидааст.

Дар TelegramFacebookInstagramOK ва ВК бо мо бимонед.