Моҳи сентябри соли ҷорӣ Маркази миллии тестӣ (ММТ) бо роҳандозии даври нави қабул ба довталабон имкони дигари донишҷӯ шуданро медиҳад. Ин тасмим дар пайи иҷро нашудани нақшаи қабули донишҷӯён гирифта шудааст.

Сабзаалӣ Ҷаъфарзода, директори Маркази миллии тестӣ, имрӯз, 3-юми август, дар нишасти матбуотӣ гуфт, ин марҳила комилан нав буда, дар он ҳама метавонанд иштирок кунанд, аммо ҷой ва ихтисосҳо маҳдуд аст.

ММТ солҳои қаблӣ як даври асосӣ ва як даври такрориро барои довталабон ҷиҳати дохилшавӣ ба донишгоҳу донишкадаҳо баргузор мекард.

Соли гузашта, бо сабаби иҷро нагардидани нақшаи қабули донишҷӯён, даври сеюми такрорӣ баргузор карда шуд.

Бояд гуфт, ки дар ду даври такрорӣ онҳое ҳуқуқи иштирок карданро доштанд, ки дар даври асосӣ ноком шуда буданд.

Соли ҷорӣ бошад, баъди баргузории як даври асосӣ ва ду даври такрорӣ, даври комилан нави бақайдгирии довталабон ба роҳ монда мешавад, ки ҳадафи аслии он, боз ҳам пурра кардани нақшаи қабули донишҷӯён аст. Ва дар ин давр, ҳама, бо шумули онҳое, ки дар даври асосӣ иштирок накардаанд, метавонанд ширкат варзанд.

Сабзаалӣ Ҷаъфарзода мегӯяд, имсол ду даври такрории қабули донишҷӯён мутаносибан 12 - 15 ва 24 -26-уми август баргузор гашта, даври нави бақайдгирии довталабон моҳи сентябр ба роҳ монда мешавад.

Сабзаалӣ Ҷаъфарзода
Asia-Plus

Директори ММТ таъкид мекунад, ки “дар даври комилан нав теъдоди ихтисосҳо маҳдуд аст” ва онҳое комёр мешаванд, ки ихтисосҳои дар даврҳои қаблӣ холимондаро интихоб кардаанд.

“Довталабоне, ки дар се даври аввали бақайдгирӣ ба тақсимот роҳ ёфтанд ва комёб гардида, ба донишгоҳу донишкадаҳо роҳхат гирифтанд, беҳтар аст тибқи роҳхати соҳибшудаашон таҳсил кунанд”, - ҳушдор дод роҳбари ММТ.

Зикр кардан ба маврид аст, ки соли ҷорӣ тибқи иттилои ММТ, нақшаи қабули донишҷӯён ба донишгоҳу донишкадлаҳои кишвар 53 дарсад иҷро шудааст. Яъне дар даври аввали тақсимоти ММТ беш аз 59 ҳазор довталаб ҳаққи донишҷӯ шуданро пайдо кардаанд. Дар ҳоле ки нақшаи қабул, ба гуфтаи масъулини ин ниҳод, беш аз 110 ҳазор муқаррар шуда буд.

Роҳбари ММТ мегӯяд, сабаби иҷро нашудани нақшаи қабул кам гардидани теъдоди хатмкунандагони мактаби миёна ва зиёд муқаррар шудани нақшаи қабул аст.

Коршиносон бар ин назаранд, ки яке аз омилҳои аслии иҷро нашудани нақшаи қабули донишҷӯён, қонун “Дар бораи уҳдадории ҳарбӣ ва хидмати ҳарбӣ” мебошад. Ин қонун магистрантҳо ва докторантҳоро аз ҳуқуқи ба таъхир андохтани хидмати ҳарбӣ маҳрум намуд. Тибқи ин қонун, донишҷӯёне, ки кафедраҳои ҳарбии донишгоҳҳоро хатм мекунанд, низ уҳдадоранд як сол хидмати ҳарбиро адо кунанд.

Дар Telegram, Facebook, Instagram, OK ва ВК бо мо бимонед.