Дар вилояти Чуйи Қирғизистон ду занро бо гумони таблиғи зидди тоҷикон дастгир кардаанд. Мақомоти Қирғизистон 24-уми май гуфтанд, ки ин занҳо тавассути Whatsapp сокинони деҳаи Чалдовари ноҳияи Панфиловро "барои халос шудан аз шаҳрвандони Ҷумҳурии Тоҷикистон" даъват мекарданд.

Бино ба иттилои бахши қирғизии "Озодӣ" дар оғоз ин занҳо ба “майдаавбошӣ” муттаҳам буданд, вале тафтишот онҳоро ба барангехтани кинаву адовати байни миллатҳо муттаҳам кардааст.

Пулиси Қирғизистон гуфтааст, яке аз занон 23-сола ва дигаре 20-сола буда, рӯзи 22-юми май дастир шуданд ва ҳоло дар ҳабси пешакӣ ҳастанд.

Рӯзҳои 28 ва 29-уми апрели имсол дар сарҳади Тоҷикистону Қирғизистон задухӯрди мусаллаҳона рӯй дод. Мақомоти Тоҷиктсон гуфтанд, ки дар ин ҳодиса 19 нафар кушта ва 87 нафар захмӣ шуданд. Ҷониби Қирғизистон дар бораи 36 кушта ва 154 маҷрӯҳ хабар дод.

Дирӯз, сарвазири Қирғизистон Улуғбек Марипов дар саҳифаи расмияш дар Фейсбук навишт, ки Қирғизистон то ҳалли шудани мушкилот бо Тоҷикистон равуои марзӣ бо ин кишварро комилан қатъ мекунад. Ҷониби Тоҷикистон то кунун дар ин маврид вокунише накардааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.