Бо амри президенти Ӯзбекистон Шавкат Мирзиёев вазифаи роҳбари Дастгоҳи президенти ин кишвар дигарбора барқарор шуда, Саида Мирзиёева, духтари сарвари ин давлат роҳбари он таъин шуд.
Тавре ки "gazeta.uz" хабар медиҳад, Саида Мирзиёева қаблан ба ҳайси ёвари президенти Ӯзбекистон ифои вазифа мекард.
Аз моҳи августи соли 2023 Саида Мирзиёева дар вазифаи ёвари президент ва то ин вақт - аз моҳи ноябри соли 2022 дар мансаби мудири бахши коммуникатсия ва сиёсати иттилоотии Дастгоҳи иҷроияи президент кор мекард.
Ин бахш ба сохтори низоми собиқ муовини роҳбари дастгоҳ Комил Аламҷонов, ки ба омӯзиши афкори умум ва сиёсати иттилоотӣ масъул буд, дохил мешуд.
Саида Мирзиёева хатмкардаи Донишгоҳи иқтисод ва дипломатияи ҷаҳонӣ, магистри Донишгоҳи давлатии ҳуқуқшиносии Тошканд ва Донишгоҳи давлатии Маскав ба номи Ломоносов, номзади илмҳои иқтисодӣ мебошад.
Давоми солҳои 2019-2020 вазифаи муовини директори Агентии иттилоот ва коммуникатсияҳои оммавии Дастгоҳи президент (зери роҳбарии Аламҷонов) ва сипас - муовини раиси шӯрои сарпарастии Фонди дастгирӣ ва рушди расонаҳо (он замон ҳам Комил Аламҷонов раиси Шӯро буд)-ро ба уҳда дошт.
Шавкат Мирзиёев моҳи августи соли 2023 сохтори нави Дастгоҳи президенти Ӯзбекистонро тасдиқ кард Он замон вазифаи роҳбари Дастгоҳи президент барҳам дода шуда, инчунун боз ду вазифаи ёвари президент таъсис ёфт ва теъдоди ёварон аз 9 то 11 нафар зиёд шуд.
Роҳбари пешинаи Дастгоҳи президенти Ӯзбекистон давоми солҳои 2022-2023 Сардор Умурзоқов буд, ки айни замон ба ҳайси ёвари президент оид ба супоришҳои махсус ифои вазифа мекунад.
Руcский