Сиёсатшиноси тоҷик бар ин назар аст, ки бесуботиву ноамнӣ ва беназмӣ дар Қирғизистон ба таъмини сулҳу субот дар тамоми кишварҳои минтақаи Осиёи Марказӣ таъсир мерасонад.

“Собиқ президенти Қирғизистон Алмосбек Отамбоев ихтиёрӣ ба ҳукуматдорон таслим шуда, оқилона рафтор намуд ва бо ин амалаш исбот кард, ки бесуботиву хунрезиро дар ватанаш намехоҳад”, - гуфт дар суҳбат бо “Азия-Плюс” сиёсатмадори тоҷик, доктори илмҳои ҳуқуқшиносӣ Шокирҷон Ҳакимов.

Ба ақидаи ӯ, агар айбномаҳои зидди Отамбоев пешниҳодшуда воқеъбинона дар доираи қонунҳои кишвар мавриди тафтиш қарор нагирифта, ба сиёсат ангехта шаванд, дар Қирғизистон эътирозҳои аҳолӣ ба вуҷуд омаданаш имкон дорад.

“Бесуботиву ноамнӣ ва беназмӣ дар Қирғизистон ба таъмини сулҳу субот дар тамоми кишварҳои минтақаи Осиёи Марказӣ таъсир мерасонад”, - таъкид дошт Ҳакимов.

Дар ҳамин ҳол, собиқ президенти Қирғизистон Алмосбек Отамбоев то 26 август дар тавқифгоҳи муваққатӣ (СИЗО)-и КДАМ нигаҳдорӣ мешавад. Дар ин бора ба 24.kg адвокати ӯ Сергей Селесарев хабар додааст.

Ёдрас мекунем, ки дар рӯзи дуюми амалиёти боздошти собиқ президенти Қирғизистон ба кормандони мақомоти қудратӣ муяссар шуд, ки ба манзилаш дар деҳаи Кӯй-Тош дар канори Бишкек ворид шаванд. Отамбоев баъд аз як музокирот бо намояндаи мақомот ба берун баромад ва таслим шуд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.