Душанбе. 18-уми июл. ОИ «Азия-Плюс»-«Помир Медиа» - Дар Донишгоҳи давлатии Хоруғ муаррифии як барномаи нав таҳти унвони истифодабарии нерӯи барқи офтобӣ ва бодӣ баргузор гардид.

Профессорони донишгоҳи технологияи энергетикии   Афина   Петрос Аксополусус ва Воҳид Розиков- донишгоҳи техникии Тоҷикистон ҳадафи барномаро   тайёр намудани мутахассисони тоҷик дар риштаи   табдили шуоъи офтоб ва вазиши ҳаракати   бод ба нерӯи барқ арзёбӣ намуданд. Профессори донишгоҳи Афина изҳор дошт, ки дар барномаи тайёр намудани мутахассисони риштаи   истфодабарии барқи офтобӣ ва бодӣ мутахассисони се кишвари урупои- Олмон, Суис, Юнон ва донишгоҳҳои техникии Қазоқистон ва Тоҷикистон   хамкорӣ доранд.

Ба андешаи профессори донишгоҳи Афина   Тоҷикистон метавонад куллан ниёзашро ба энержӣ аз ҳисоби истифодаи самараноки барқи офтобӣ ва бодӣ бароварда созад.

Аммо ба гуфтаи профессори Донишгоҳи техникии Тоҳикистон Вохид Розиқов ҳамкорӣ дар ин ришта   дар марҳилаи оғоз қарор дорад, вале бо назардошти болоравии нархи маводи сӯхт дар бозори ҷаҳонӣ масоили истифодаи барқи офтобӣ ва бодӣ дар кишвар аҳамияти махсус касб мекунад.

Дар ҳамин ҳол, мудири кафедраи физикаи Донишгоҳи Хоруғ   Ширинбек Некқадамов изҳор дошт, ки ҷиҳати зиёд будани таъсири нурҳои ултрабунафш дар манотиқи баландкӯҳ дар Бадахшон ҳанӯз дар солҳои 1980-ум таҷоруби табдили қувваи рӯшноӣ ва бод ба нерӯи барқ оғоз шуда, аммо пасон ба гӯшаи фаромӯшӣ гузошта шуданд.