Пас аз ҳабси чандмоҳа ду адад чархболи ширкати ҳавопаймоии «Тоҷик Эйр» аз Афғонистон баргардонида шуданд.

Директори генералии ширкати давлатии ҳавопаймоии «Тоҷик Эйр» Фирӯз Ҳамроев дар ин робита зимни нишасти хабарии имрӯза изҳор намуд, ки пас аз хизматгузории техникӣ чархболҳо боз мавриди истифода қарор мегиранд.

«То охир вазъро ба мо шарҳ надоданд, вале ин нофаҳмиҳои миёни ҳукумати Афғонистон ва ширкати хусусии «Суприм» аст, ки чархболҳои мо ва якчанд ширкатҳои дигар дар он фаъолият доштанд», - иброз дошт вай.

Ёдрас мекунем, ки нимаи тобистони соли гузашта ҳукуматдорони Афғонистон ду адад чархболи Ми-8 -и ширкати ҳавопаймоии «Тоҷик Эйр» бо 12 нафар ҳайати халабонону кормандони техникиашро боздошт намудаанд. Онҳо тибқи қарордод дар Афғонистон фаъолият доштанд.