Тахминан соатҳои 6:00-и субҳи имрӯз дар мавзеи "Кех", 10-километрии маркази ҷамоати Ворухи шаҳри Исфара миёни марзбонони тоҷику қирғиз тирпарронӣ сурат гирифт. Дар ин бора ба “Азия-Плюс” сокинони ҷамоати Ворух хабар доданд.
“Аз ҷониби мо фавтида ҳаст - сарбози хидмати ҳатмии ҳарбӣ. Ӯро ба сардхона (морг)-и бемористон интиқол доданд”, - хабар дод манбаъ. Бино ба гуфтаи ӯ, дар ҳоли ҳозир дар бемористон барои қабули захмиён омодагӣ мегиранд.
Як манбаъи мӯътамади “Азия-Плюс” аз неруҳои интизомии Тоҷикистон ин хабарро таъйид кард ва гуфт, ҷониби Қирғизистон аз соати 6:00-и субҳ “бе ягон сабаб ё муноқиша ба тарафи мо тир холӣ карданд”. Ба иттилои манбаъ неруҳои Қирғизистон ба самти мавзеи сарҳадии “Кех” дар ҷамоати Ворухи Исфара аз миномиёту дигар яроқи ҷангӣ тир паронданд.
Дар ҳамин ҳол, дафтари матбуоти Хадамоти марзбонии КДАМ Қирғизистон дар ин робита аллакай изҳорот пахш намуд.
Тибқи маълумоти хадамот, тахминан соати 7-и субҳ (6 - бо вақти Душанбе) дар мавзеи Булак-Бошии ноҳияи Ботканди вилояти Ботканд аз ҷониби дидбонгоҳи сарҳадии “Кех”-и Қушӯнҳои сарҳадии КДАМ Тоҷикистон ба сӯи дидбонгоҳи сарҳадии “Булак-Бошӣ”-и Хадамоти мазбонии КДАМ Қирғизистон тир паронида шудааст”, - менависад хабаргузории АКИ пресс бо истинод ба сарҳадбонон.
Дар посух аз ҷониби Қирғизистон низ ба самти дидбонгоҳи сарҳадии Тоҷикистон низ тир паронида шудааст.
Тибқи маълумоти ҷониби Қирғизистон, намояндаи Хадамоти марзбонии Қирғизистон дар вилояти Ботканд ва намояндаи мақомоти сарҳадбонии Тоҷикистон дар вилояти Суғд тариқи телефон гуфтугӯ карда, сардорони отрядҳои сарҳадии ҷонибҳо ба ҷойи ҳодиса рафтаанд.
Бино ба маълумоти марзбонони қирғиз, ҷониби Тоҷикистон бо истифода аз норинҷакафкан (гранатомёт) ва миномётҳо тирпаронӣ кардааст.
Мақомоти расмии Тоҷикистон то ҳол ба ҳеҷ гунае ин ҳодисаро шарҳ надодаанд.
Ёздаҳ рӯз пештар, зӯҳри 03-уми июн низ дар ин мавзеъ миёни неруҳои тоҷик ва қирғиз даргирӣ сар зада чанд соат давом кард ва аз ду ҷониб чанд тан захмӣ шуданд. Вазорати умури хориҷии Тоҷикистон дар баёнияе неруҳои Қирғизистонро дар оғози тиркушоӣ муттаҳам карда амалкарди онҳоро иғвои аз пеш барномарезишуда номид. Вазорат рӯзи 04-уми июн ва пас аз як рӯзи даргирӣ дар вебсайти расмияш гуфт, сарбозони қирғиз барқасдона ба маҳалли назорати посгоҳи марзи “Кех” дар ҷамоати Ворухи шаҳри Исфара ворид шуданд. Аммо дар посух ба талаби ҷониби Тоҷикистон, сарбозони қирғиз камин гирифта тирандозиро сар кардаанд ва вазъ баъди он бадтар шуд.
Ҷониби Қирғизистон низ дар як баёнияе неруҳои Тоҷикистонро дар даргирии оғози моҳи июн муттаҳам карда гуфта буд, марзбонони тоҷик ғайриқонунӣ хатти марзро дар мавзеи Булоқбошии вилояти Бодканд убур карда ба қаламрави Қирғизистон гузаштаанд. Он замон Қирғизистон аз маҷрӯҳ шудани ду сарбозаш хабар дод ва бино ба мабъулумот аз Тоҷикистон як кас захм бардоштанд.
Вазъ дар марзи миёни Тоҷикистону Қирғизистон аз охири моҳи апрели соли 2021 печида аст. Дар муноқишаҳои ду соли ахир аз ду ҷониб даҳҳо нафар куштаву захмӣ шуданд, ки миёнашон ба ҷузъ ҳарбиён шаҳрвандони мулкӣ низ буданд.
“Сол аз сол гарон мешавад”. Сокинони Душанбе барои либос ва лавозимоти мактабӣ имсол чанд пул харҷ карданд?
Баъди нашри матлаби “Asia-Plus”, директори Театри Камоли Хуҷандӣ гуфт, саркоргардон бо хоҳиши худ аз вазифа озод карда шуд
Аз агрегати чоруми НБО “Норак” то корхонаи равғанбарорӣ. Эмомалӣ Раҳмон дар шаҳри Норак боз кадом иншоотро ифтитоҳ кард?
Сафи муаллимон аз Русия дар мактабҳои Тоҷикистон зиёд мешавад
Дар пайи мушкили вуруди муҳоҷирон ба Русия, Сафири Тоҷикистон бо консулҳои генералӣ вазъро баррасӣ кард
Дар Душанбе аз 1 сентябр шумори нақлиёти ҷамъиятӣ зиёд мешавад
Боздошти 3 ронандаи маст дар Душанбе давоми 1 шабонарӯз
Оё рақамисозии бахши кишоварзӣ бидуни Интернет имконпазир аст?
Пас аз таҷдид, агрегати чоруми НБО “Норак” ба истифода дода шуд
“Аудиокитоб” бо Субҳон Ҷалилов. Маснавии маънавӣ. Ҳикояи “Ҳамлаи саг ба кӯри гадо”
Кулли ахбор
Авторизуйтесь, пожалуйста