Душанбе 11-уми июл. ОИ «Азия-Плюс» - Шаҳрванди Тоҷикистон Комилҷон Эшонқулов ба ҷурми даст доштан дар инфиҷори назди бинои Додгоҳи Олӣ ба 22 соли зиндон маҳкум гардид.

Аз додгоҳи шаҳри Душанбе ба ОИ «Азия-Плюс» иттилоъ доданд, ки К.Эшонқулов пас аз як моҳи ҳодиса боздошт гардида буд. «Зимни тафтишот муайян карда шуд, ки инфиҷор бо супориши нерӯҳои зиддиконститутсионӣ бо мақсади ташаннуҷи авзоъ ба амал оварда шудааст», - изҳор дошт сарчашма.

Ёдрас мекунем, ки таркиш дар назди бинои Додгоҳи Олӣ санаи 16-уми июни соли 2007 рух дода буд. Додситони шаҳр Қурбоналӣ Муҳаббатов, ки зуд ба макони ҳодиса ҳозир гашта буд, он замон ба рӯзноманигорон изҳор дошта буд, ки «амали террористӣ бо мақсади тарсонидани шаҳрвандон ва шояд баъзе кормандони ҷудогонаи Додгоҳи Олӣ равона карда шудааст». Дар ҳамин ҳол, ӯ ҷанбаи сиёсӣ доштани инфиҷорро комилан рад кард.

Бар асари инфиҷор талафоти ҷонӣ набуд, танҳо ба бинои Додгоҳи Олӣ каме зарар расид.